مولوی تراب علی لکھنوی: ابو البرکات کنیت،رکن الدین لقب تھا، یگانہ روزگار فاضلِ نامدار،جامع معقول و منقول،حاوئ فروع واصول تھے۔حاشیہ ہلالین[1]فی شرح تفسیر جلالین آپ کی اشہر تصنیفات سے ہے۔وفات آپ کی ۱۲۸۰؁ھ میں واقع ہوئی۔’’زینتِ شبستان‘‘ تاریخ وفات ہے۔

1۔ علامہ تراب علی بن شجاعت علی بن فقیہ الدین بن محمد دولت بن مفتی ابی البرکات دہلوی امروہوی ثم لکھنوی: ولادت ۱۲۱۳؁ھ،وفات ۱۲۸۱؁ھ حاشیہ ہلالین کا نپور میں طبع ہو چکی ہے، تذکرہ علمائے ہند میں ان کی چالیس تصانیف کے نام دیے ہوئے ہیں۔

(حدائق الحنفیہ)