محمدمیاں قادری برکاتی مارہروی، تاج العلماسیّد شاہ اولادِرسول

نوٹ:  حضرت تاج العلما رحمۃ اللہ تعالیٰ علیہ نے’’تاریخ خاندانِ برکات‘‘ میں جواپنی سوانحِ حیات خودتحریرفرمائی ہے، اُسی کو بطورِتبرک من وعن نقل کرتاہوں۔ان کےالفاظ میں جوخیرِ کثیر ہے،وہ اس عاصی کےپاس کہاں؟(فقیرتونسوی غفرلہ)        

تاج العلما حضرت سیّد شاہ اولادِرسول محمدمیاں قادری برکاتی مارہروی رحمۃ اللہ تعالیٰ علیہفرماتےہیں:

’’فقیر کی ولادت 23؍ رمضان لمبارک 1309 ھ میں اپنے حضرت جدِّ امجد قُدِّسَ سِرُّہٗ کے دولت خانے واقع محلہ تا مسین گنج ضلع  سیتاپور میں ہوئی۔’’اولادِ رسول فخر العالم محمد‘‘ پر عقیقہ کیا گیا بعد کو ’’محمد‘‘ کےساتھ بوجہ مطابق نام پاک حضور صاحبِ لولاکﷺ بنظرِ تعظیم لفظ ’’میاں‘‘  کا اضافہ ہو کر ’’محمد میاں‘‘ نام زیادہ متعارف ہوا، اور فقیر بھی اپنا یہی نام اکثر استعمال کرتا ہے۔ اور چوں کہ فقیر کےبرادرِ معظّم کا نام فقیر عالم تھا؛ لہٰذا، بعض بزرگ اس کی مطابقت وزن سے فقیر کو محمد عالم کہتے تھے۔

درسیات مروجہ مختصر فارسی اپنے حضرت والدِ ماجد دامت برکاتہم العالیۃ اور منشی فرزند حسن صاحب ساکن قصبہ پانی ضلع ہردوئی اور مولوی میا ں جی رحمت اللہ صاحب مارہروی سے پڑھیں اور انہیں تینوں اور اپنے برادرِ معظّم سیّد شاہ غلام الدین فقیر عالم مرحوم سےمشق خط کی اور درسیاتِ مروجہ درسِ نظامی عربی فقہ و اصولِ فقہ  و نحو و صرف و معانی و بیان و منطق و فلسفہ و عقائد و کلام تفسیر و حدیث وغیرہ اپنے حضرت والدِ ماجد قبلہ و کعبہ دامت برکاتہم العالیۃ و مولوی سیّد حیدر شاہ صاحب پشاوری و مولوی غلام رحمانی صاحب ولایتی و حافظ امیر اللہ صاحب  بریلوی و مولانا عبد المقتدر صاحب بدایونی سے پڑھیں اور بعض دیگر سے بھی چند اسباق پڑھے۔ ان درسیات کا غالب حصہ مولوی حیدر شاہ صاحب پشاوری سے پڑھا۔درسیات کی آخری کتب پڑھانے کے بعد ان کا ارادہ حسبِ دستورِ زمانہ سندِ تکمیل دینے کا تھا مگر بعض وجوہ کی بنا پر وہ اپنے وطن چلے گئے اور پھر ان سے سندِ تحریری کی نوبت نہ آئی۔

علمِ حدیث وغیرہ کی سند فقیر کو اپنے خاندانی تسلسل، اپنے حضر ت والدِ ماجد قبلہ و حضرت نانا صاحب قبلہ سیّد شاہ ابو الحسین احمد نوری میاں صاحب سےبِحَمْدِہٖ تَعَالٰی حاصل ہے۔ قرآنِ مجید فقیر نے اپنے حضرت والدِ ماجد قبلہ اور برادرِ معظّم سیّد شاہ غلام محی الدین فقیر عالم وہمشیرۂ معظّمہ اہلیۂ سیّد مہدی حسن صاحب اور جناب استادِ مکرم حافظ عبد الکریم صاحب ملک پوری مرحوم سے حفظ کیا اور حافظ امیر اللہ صاحب بریلوی اور بعض دیگر سے بھی چند سبق پڑھے اور کچھ دور کیا ہے۔

اور فقیر  کو اگرچہ حضرت امامِ اہلِ سنّت مولانا  احمد رضا خاں صاحب بریلوی قُدِّسَ سِرُّہٗ سے تلمذِ رسمی حاصل نہیں مگر فقیر ان کو اپنے اکثر اساتذہ سے بہتر و برتر اپنا استاد جانتا ہے۔ ان کی تقریرات و تحریرات سے فقیر کوبہت کثیر فوائدِ دینی و عملی حاصل ہوئے اور چوں کہ تقریر و تحریر میں ان کا طریقہ بے لوث اور مواخذاتِ صوری و معنوی  شرعی و عرفی سے منزّہ و مبرا ثابت و محقق ہوا لہٰذا فقیر بھی تا بہ وسعت ان کے طریقے کا اتباع کرنا پسند کرتا ہے۔اللّٰھم و فقنا لما تحب و ترضٰی۔ آمین یا رب العالمین۔

بیعت طریقۂ عالیہ قادریہ برکاتیہ میں اور اس سلسلہ و نیز دیگر سلاسلِ عالیہ نقشبندیہ ابو العلائیہ و چشتیہ نظامیہ و سہروردیہ جدیدہ وقدیمہ میں اجازت و خلافت اور بعض دیگر سلاسل و جملہ اوراد و اذکار و اشغال و اعمال و وظائف و احادیثِ شریفہ و قرآنِ مجید  و مصافحات وغیرہ برکات کی اجازت اپنے حضرت والدِ ماجد قبلہ و کعبہ و دامت برکاتہم العالیۃ حضرت سیّد شاہ محمد اسماعیل حسن صاحب اور اپنے نانا صاحب زبدۃ الواصلین حضرت سیّد شاہ ابو الحسین احمد نوری میاں صاحب قُدِّسَ سِرُّہٗ سے حاصل ہے۔‘‘(تاریخ خاندان برکات، صفحہ65)

تاریخِ وصال:

24؍جمادی الآخرہ1375ھ مطابق 7؍فروری 1956ء، بعدنمازعشا، 8؍بج کر48؍ منٹ پرآپ نےوصال فرمایا۔مارہرہ مطہرہ میں مرقدِمبارک ہے۔

تعلیماتِ حضرت تاج العلمارحمۃ اللہ تعالٰی علیہ:

1.    اپنے آپ کو اللہ تعالیٰ اوراس کےحبیبﷺکا سچا پکا مطیع و فرماں بردار محب و محبوب بندہ پہلے بنا کر اس طرح اپنی فریاد سنی جانے کے لائق اپنے آپ کو ٹھہرا کر اپنی فریاد فریا درس حقیقی ربِّ عزت تبارک و تعالیٰ اور اس کی عطا سے اور اس کے حکم سے اس کے محبوب اپنے آقا محمد مصطفٰیﷺہی کے دربار میں ہم پیش کریں۔یاد رکھیے! ہم غربائے مسلمین کی حقیقی پائیدار کامل اکمل داد رسی اور اعدا و دشمنان دین کی مکمل و مستقل قطعی سرکو بی وہیں سے اور صرف وہیں سے ہوگی۔

2.    یہ دنیا عالم اسباب ہے۔ حقیقی بھروسا تو اللہ و رسول جل و علا و علیہ الصلاۃ و السلام پر رکھیے ظاہری اسبابی لحاظ سے خود اپنے قوتِ بازو اور قوتِ عمل پر بھروسہ کیجیے۔ ہرگز ہرگز کسی بےدین و بددین فرد اور جمعیت کی طر ف دستِ التجا نہ پھیلائیے۔ ان میں سے کسی کو بھی خواہ وہ وہابیہ کی جمعیت العلما ہو یا لیگ و کانگریس سوشلسٹ و کمیونسٹ و مہا سبھا وغیرہ اسی قماش کی دوسری جمعیتیں اور انجمنیں اور ان کے اہلکاران و کار کنان کو ہرگز ہرگز اپنا مخلص چارہ گر اوربے لوث ہمدرد ہرگز نہ جانیے۔

3.    لیڈری چالوں سے بہت ہوشیار رہیے۔ تجربے نے خوب ظاہر کردیا ہے کہ لیڈری چالوں میں وقتی اظہارِ جوش و خروش،شور و غوغا،اشتعالِ بےسود بلکہ مضر تو بہت ہوتا ہے مگر ٹھوس اور پائیدار مفید نتیجہ کچھ نہیں نکلتا؛ بلکہ اور غریب مسلمان کمزور سے کمزور تر ہوجاتے ہیں۔

4.    اہلِ سنّت باہمی اتحاد اور تنظیم کریں۔ ایک دوسرے کے دُکھ درد و ر نج وراحت کے شریکِ حال بنیں۔

5.    بُری رسمیں اور محرمات اور کھیل کود لغویات میں اپنے اوقات اور اموال کو ضائع کرنے سے بچا کر اپنی معیشت اور دنیوی مالی حالت درست کریں، سینما قطعاً دیکھنا چھوڑ دیں(فی زمانہ فلمیں، ڈرامے، غیرِشرعی پروگرامز، انٹرنیٹ وموبائل کابےجااستعمال)۔

6.    کاہلی اور بے عملی کو چھوڑ دیں۔ شریعتِ مطہرہ کو اپنا دستور العمل زندگی ظاہری و باطنی قولی و عملی بنائیں۔ طاعت و عبادت کے بعد جو اوقات بچیں وہ جائز تجارت مفید زراعت کار آمد اور سود مند صنعت و حرفت غرض اُن اُمور میں صرف کریں جن سے دنیا سنبھلے اور دین کو بھی اُس سے قوت ملے۔

7.    صبر و قناعت اور تقویٰ سے گزر اوقات کرنا اور انہیں سے اعدا و مخالفین کا مقابلہ کرنا سیکھیں۔

8.    بقدرِ ضرورت علمِ دین ضرور حاصل کریں تو ان شآء اللہ العزیز الکریم و بفضل رسولہ العظیمﷺ بیڑا پاررہے اور یہی اغیارو کفّار و اشرار جو آج ہماری بد عملی اور بے عملی سے ہمارے جان و مال عزت و ناموس ہی پر نہیں بلکہ ہمارے مقدس دین اسلام اور پیارے مذہب اہل سنّت اور ہمارے معظّمانِ دین کی مقدّس بارگاہوں اور رفیع شانوں میں گستاخ خیرہ سردار دردیدہ دہن ہیں کل ہمارا لوہا مانیں گے اور ہمارے سامنے سپر انداختہ ہوں گے۔ لیڈرانِ قوم کے خود ساختہ پروگرام تو آج کل کے مدّعیانِ اسلام نے بہت آزما لیے اور اُن کے سخت مضر اور مہلک نتیجے بھی آنکھوں کے سامنے ہیں۔ فقیر کے برادرانِ دین و طریقت اب اس شرعی دینی اسلامی سہل و مختصر بے شورو شردستور العمل پر بھی عمل کرکےدیکھیں۔ان شآء اللہ تعالٰی وہ اِس ارشادِ رحمانی کے جلوے اپنی آنکھوں دیکھ لیں گے کہ

وَمَنۡ یُّطِعِ اللہَ وَ رَسُوۡلَہٗ فَقَدْ فَازَ فَوْزًا عَظِیۡمًا﴿۷۱﴾ (الاحزاب:۷۱)

ترجمہ: جس نے اللہ و رسول جل و علا و علیہ الصلاۃ والسلام کا کہنا مانا، بے شک وہ عظیم کامیابی کو پہنچا۔

(اہلِ سنّت کی آواز، 2010ء، ص250)