حضور امین شریعت مختصر تعارف

ملنے کے نہیں نایاب ہیں ہم
حضور امین شریعت مختصر تعارف

ولادت با سعادت:
 امین شریعت حضرت علامہ سبطین رضا قدس سرہ اعلی حضرت امام احمد رضا محدث بریلوی رضی اللہ تعالیٰ عنہ کے خاندان کی بلند و بالا شخصیت ، برادر اعلیٰ حضرت استاذ زمن حضرت علامہ حسن رضا خاں قدس سرہ کے پوتے تھے۔آپ نومبر ۱۹۲۷ء کو محلہ سودا گران بریلی شریف میں اس مکان کے اندر پیدا ہوئے  جوکہ خانقاہ عالیہ قادریہ رضویہ کی عقبی جانب واقع ہے اسی مکان کے اندر آپ کے دادا جان استاذ زمن قدس سرہ ایک عرصہ تک سکونت پذیر رہے۔

تعلیم و تربیت:
 آپ چونکہ ایسے گھرانے میں پیدا ہوئے کہ جس خاندان کے علم کا شہرہ آج بھی چہار دانگ علم میں خوب ہوتا ہے اس لئے اپ کی تعلیم کی ابتدا آپ کے گھر سے ہی ہوئی، بریلی شریف میں ہی دارالعلوم مظہر اسلام سے سند فضیلت حاصل کی، اور جدید علوم مسلم یونیورسٹی علی گڑھ سے حاصل کئے۔آپ کے مشہور اساتذہ حضرت علامہ حسنین رضا خاں بریلوی قدس سرہ ، صدر الشریعہ بدرالطریقہ حضرت علامہ امجد على اعظمی قدس سرہ، مصنف قانون شریعت ، شمس العلما حضرت علامہ شمس الدین جعفری جونپوری قدس سرہ اور حضرت علامہ حافظ عبد الرؤف بلیاوی قدس سرہ وغیرہ ہیں۔ اس کے علاوہ آپ نے حضور مفتی اعظم ہند علامہ مصطفیٰ رضا بریلوی قدس سرہ سے بھی علمی و روحانی فیض حاصل فرمایا۔آپ حضور مفتی اعظم ہند قدس سرہ کے مرید و خلیفہ تھے۔

تدریسی خدمات:
 حضور امین شریعت قدس سرہ نے درس و تدریس کا آغاز دارالعلوم مظہر اسلام سے فرمایا پھر مدرسہ اشاعت الحق ہلدوانی ضلع نینی تال ، جامعہ عربیہ اسلامیہ ناگ پور اور مدرسہ فیض الاسلام کیش کال ایم پی وغیرہ میں تدریسی خدمات انجام دیں۔
 کانکیر ضلع بستر چھتیس گڑھ آپ نے اپنا مسکن بنایا اور آپ نے اس جگہ کو دیکھ کر فرمایا تھا کہ یہ تو وہی جگہ ہے کہ جس کو میں خواب میں دیکھ چکا ہوں وہاں آپ نے دین و سنیت کی خدمت کی جہالت کو دور کیا وہاں جہالت کا اتنا غلبہ تھا کہ پڑھے لکھے لوگ آسانی سے دیکھنے کو نہیں ملتے تھے۔ نا خواندگی کا اندازہ اس واقعہ سے لگایا جا سکتا ہے کہ آپ کے پاس ایک گوشت بیچنے والا آیا اور کہنے لگا کہ اس چھری پر پڑھ دیجیے اس کا مقصد یہ تھا کہ جب چھری پر پڑھ کر پھونک دیا جائے گا تو کبھی اس پر بسم اللہ پڑھنے کی ضرورت نہیں پڑے گی۔ حضرت نے وہاں ایسی محنت کی کہا جاتا ہے کہ اب وہاں بہت کثرت سے علمائے کرام پائے جاتے ہیں۔

تبلیغی خدمات:
 تبلیغ اسلام کی خاطر آپ نے اپنا چین و سکون عیش و آرام سب کچھ قربان فرمادیا تھا گھر گھر جاکر لوگوں میں تبلیغ فرماتے تھے ایک واقعہ میں نے حضرت کے بارے میں سنا کہ جب آپ صبح کو سائکل سے نکلتے تو سفید کپڑے زیب تن فرماتے وہاں کی مٹی ہلکی سرخ (اینٹوں کے رنگ کی) ہونے کی وجہ سے شام تک وہ کپڑے سرخ ہو جایا کرتے تھے ۔

 جی ہاں حضور امین شریعت قدس سرہ بلند اخلاق، پاکیزہ کردار، اسلاف کی امانتوں کے سچے وارث و جانشین، علم و عمل کا پیکر، صدق و صفا اور استقامت کے جبل عظیم تھے انہوں نے سادہ مکان کے اندر اپنی زندگی گزاردی اور لوگوں کے دلوں کو ایمان کی حلاوت اور چاشنی کا مزہ بخشا۔

وفات:
 آج24؍محرم الحرام 1437ھ؁ مطابق ۹؍نومبر2015ء بروز پیر ایک بجکر پینتالیس(1:45) منٹ پر اس دار فانی سے کوچ فرما گئے۔ اللہ تعالیٰ حضرت کے کے درجات کو بلند فرمائے، ان کے پسماندگان کو صبر جمیل عطا فرمائے،ہم غربائے اہل سنت کو ان کا نعم البدل عطافرمائے ہم لوگوں کو ان کے روحانی فیوض و برکات سے مالامال فرمائے۔
آمین بجاہ النبی الامین الکریم

محمد راحت خان قادری غفرلہ
رکن المکتب النور، بانی وناظم دارالعلوم فیضان تاج الشریعہ بریلی شریف (یو۔پی) انڈیا