ہوئے تولد حبیب رحماں
ہوئے تولّد حبیبِ رحماں خدا کا اُن پر دُرود دائم
کہیں بہم ہو کے جِنّ و انساں خدا کا اُن پر دُرود دائم
ہوئے تولّد حبیبِ رحمت ہے جن کا ادنیٰ سا باغ جنّت
اُسی کے باعث ریاضِ رضواں خدا کا اُن پر دُرود دائم
ہوئے تولّد نبیِ اکرمﷺ مقیمِ رحمانِ عرشِ اعظم
اُنھیں سے روشن سپہرِ عرفاں خدا کا اُن پر دُرود دائم
ہوئے تولّد وہ خاصۂ حق ہوا جہاں پر ضیا و رونق
ہیں مظہرِ نورِ فیضِ یزداں خدا کا اُن پر دُرود دائم
ہوئے تولّد حبیبِ اعلیٰ ہوئے تولّد صفیِّ اصفا
شفیع و ملجائے اہلِ عرفاں خدا کا اُن پر دُرود دائم
ہوئے تولّد شفیعِ محشر ہوئے تولّد قسیمِ کوثر
ہوئے شگفتہ ریاضِ رضواں خدا کا اُن پر دُرود دائم
ہوئے تولّد وہ خیر مقدم یقیں مطیب بدل مکرم
یہ وِرد، کافؔی! ہے نورِ ایماں خدا کا اُن پر دُرود دائم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔(دیوانِ کافؔی)
