استغاثہ  

اغثنی یارسول اللہﷺ

زسرتاپا خطاکارم اغثنی یارسول اللہﷺ
گناہگارم گناہگارم اغثنی یارسول اللہﷺ
شکستہ پا شکستہ بال و پر خاطر پرا گندہ
زحالِ زار بیزارم اغثنی یارسول اللہﷺ
خدارا سوئے من بنگر بنہ دستِ کرم برسر
کر بر دوشِ زمیں بارم اغثنی یارسول اللہﷺ
تہی دست و تہی داماں گدایم بے سر و ساماں
ذلیل و رسواء و خوارم اغثنی یارسول اللہﷺ
بلطفت شادئ مرگم بخاک طیبہ کن مولیٰ
بانجامے رسَد کارم اغثنی یارسول اللہﷺ
نہ زاد راہ می دارم، نہ منزل راشنا سایم
پریشانم پئے کارم اغثنی یارسول اللہﷺ
بہر رنگے گناہگارم، بہر موئے سیہ کارم
بَہر لطفِ توحقدارم اغثنی یارسول اللہﷺ
توئی مولیٰ توئی ملجا توئی ماویٰ توئی منجا
توئی یاور توئی یارم اغثنی یارسول اللہﷺ
غریق بحر عصیاں شد، متاع عز و ناموسم
سراپا ننگِ ابرارم اغثنی یارسول اللہﷺ
تو خود احوالِ ما بیچارگاں راخوب تردانی
چہ پیشت مدعا آرم اغثنی یارسول اللہﷺ
خلیؔل قادریم رد مکن دستِ سوالم را
تُرا از تو طلبگارم اغثنی یارسول اللہﷺ

مدینے والےﷺ کی سرکار میں

’’عرضِ احوال واقعی‘‘

اے کہ ذاتِ تو تجلی گاہِ نور ایزدی
اے بذاتِ تو مزین مسند پیغبری
اے کہ نوری پیکرِ توظل ذاتِ سرمدی
اے بفرقِ پاک تو موزوں کلاہ سروری
اے کہ درشانِ تو وارد رحمۃ للعٰلمین
اے کہ جانِ غمزدہ را صبر و سکیں آمدی
گفتگوئے تست شرحِ مامضٰی وَمَا غَبَر
کیف اندازِ تکلم رشکِ قندِ پارسی
دیگراں را کے سزد شانے کہ تو داری شہا
پایۂ زیرین تو اعلیٰ زبامِ قیصری
طرۂ الفقر فخری تیری شان امتیاز
تیرے ٹھکرائے ہوئے ہیں تاج و تختِ خسروی
تاج والے جبہ فرساہیں تری سرکار میں
موجب جاہ و حِشم ہے کفش برداری تری
تیری تابش سے منور ہیں زمیں و آسماں
تیرے ذروں سے درخشاں گنبد نیلو فری
ہے وجود پاک تیرا رونق بزم جہاں
تیرے باعث گلستانِ دہر میں ہے تازگی
غلغلہ ہے آج تک بزم ملائک میں ترا
آج تک ہے محوِ استعجاب چرخِ چنبری
تیرے قدموں سے ہے وابستہ بہارِ کائنات
منتسب ہے تیرے دامن سے نشاط زندگی
یا انیس الھالکینَ التفاتے سوئے ما
یا مُراد العاشیقن یک نگاہِ دلدہی
یا شفیعَ المذنبینَ جرم مارادر گزار
رحمتہً للعٰلمینَ ملجا و ماویٰ توئی
خیزکہ افواجِ باطِل جنگ جویاں آمدند
باسنان و تیر و پیکاں برمسلماں تاختند
یارسول اللہﷺ حالِ بندگانت بنگری
گوشۂ چشم کرم للہ برما ہم کنی
دیکھئے حسرت زدوں کا دم لبوں پر آچکا
دیکھئے ناموسِ مسلم کی ہوئی عصمت دری
خوبئ تقدیر ہو یا بخت کی گردش کہ ہے
کامیابِ زندگی، ناکامیاب زندگی
خُم کے خُم ہیں مغربی میخانۂ توحید میں
ساقیانِ قوم ہیں مستِ شرابِ مغربی
صر صرِ تہذیب یورپ چل رہی ہے ہر طرف
گلستان زیست میں اڑنے لگی ہے خاک سی
کشتئ علم شریعت کی خبر تو لیجئے
بڑھتا ہی جاتا ہے طوفانِ عُلومِ فلسفی
دشمنانِ مذہب و ملت ہیں سرگرم و غا
قصرِ ملت ڈھا رہے ہیں ملحدانِ نیچری
ڈھونڈتے ہیں شاہراہ اک اور مسلم کیلئے
پردۂ اسلام میں، اسلام سے بالکل بَری
مدعا یہ ہے کہ ان کی خواہشیں آزاد ہوں
آرزو یہ ہے کہ ملّت کی بنے صورت نئی
کفر پر ایمان لائیں اور کہیں ایماں کو کفر
کجروی کو دیں یہ سمجھیں اور دیں کو گمرہی
دستگیرا! بے کسوں کی دستگیری کیجئے
لٹ گئے ہم یارسول اللہﷺ دہائی آپ کی
جان کھینچے لے رہا ہے انقلابِ حشرزا
خون چوسے لے رہے ہیں عیسوی و موسوی
ہاں بجا ہے ہم اسی قابل تھے جیسے ہوگئے
لیکن اے سرکارﷺ امت آپ کی ہے آپکی
آپﷺ گر روٹھے رہیں گے پھر ہمارا کون ہے
کون ہم آفت کے ماروں کی کریگا دلدہی
وقت ہے امداد کا سرکار اب تو آئیے
پھر نہ رونے کے لئے آئے گی ہم کو بے کسی
بول بولا ہو ترا اے دستِ تو دستِ خدا
اب تو بھر دے جھولیاں منگتا ؤنکی میرے غنی
پھونک دے پھر انجمن میں جذبۂ باطل شکن
ڈال دے ہر مردہ تن میں روحِ جوشِ غزنوی
صدق دے صدیق﷜ کا عثمان﷜ کی شرم و حیا
عدل دے فاروق﷜ کا اور زورِ بازوئے علی﷜
حِرْزِ مَنْ لَا حِرْ زَلَہ یامصطفیٰﷺ یا مجتبیٰﷺ
باہزاراں التجا گوید خلیؔل قادری
ثروتِ بے ثروتاں اے دولتِ بے دولتاں
ماغریبان و گدایاں ہم تو سلطان و شہی
اَز غم دُنیا و ہم عقبیٰ شہا آزادکُن
پادشاہا! سرورا! بہر خدا امداد کُن

مدد اے آمنہ﷞ کے لالﷺ

بہر پہلو اذیّت، ہر نفس تکلیفِ روحانی
سراپا درد بن کر رہ گئی ہے ہیستئ فانی
نزول آفاتِ پیہم کا، حوادث کی فراوانی
امید و یاس و حسرت‘ رنج و غم، حزن و پریشانی
فلک بے مہر، طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
اجڑتا جارہا ہے رفتہ رفتہ گلشنِ ہستی
حوادث آہ لوٹے لے رہے ہیں قلب کی بستی
امنگیں ہیں نہ اب دل میں، نہ اب وہ روح میں مستی
ہوئی جاتی ہے پروازِ تخیّل مائلِ پستی
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
مجسم کرب و بے چینی مرا دل ہوتا جاتا ہے
مجھے اب سانس تک بھی لینا مشکل ہوتا جاتا ہے
مسافر زیست کا گم کردہ منزل ہوتا جاتا ہے
نظر سے دُور رفتہ رفتہ ساحل ہوتا جاتا ہے
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
مسلسل رنج و غم نے چھین لی ہے ہر خوشی مجھ سے
ہنسی یوں دور ہے جیسے کہ ہے روٹھی ہوئی مجھ سے
مرا ہر ہَر نَفَس رکھتا ہے گویا دشمنی مجھ سے
نگاہیں پھیرتی جاتی ہے میری زندگی مجھ سے
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
یہ دل شام و سحر افسردہ و مغموم رہتا ہے
نہ جانے کس قدر آٹھوں پہر دکھ درد سہتا ہے
مسلسل ایک دریا اشک کا آنکھوں سے بہتا ہے
حضورﷺ اب آپﷺ سے بیمار اختؔر کہتا ہے
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
دل افگاروں کے ہر زخمِ جگر کا آپ مرہم ہیں
علاجِ لا دوا ہیں، غمزدوں کا چارۂ غم ہیں
فقط ہم بیکسوں کی آپ دنیا، آپ عالم ہیں
ہمارا آپ ہی دل، آپ ہی جاں، آپ ہی دم ہیں
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
مسلسل زخم کھا کر نیم جاں ہے قلب سینے میں
خراشیں پڑ چکی ہیں سیکڑوں اس آبگینے میں
یہ جینا بھی کوئی جینا ہے،مرنے میں نہ جینے میں
تمنا ہے پہنچکر موت آجائے مدینے میں
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
بس اب حد سے سوا ہے دردِ دل، دردِ جگر آقاﷺ
مری جانب بھی الطاف و کرم کی اِک نظر آقاﷺ
نگاہِ آرزو آٹھوں پہر ہے سوئے در آقاﷺ
خدارا کیجئے نخلِ تمنّا بارور آقاﷺ
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
سلام اے روشنی ہر کور کی، قوت ضعیفوں کی
سلام اے قسمتیں چمکانے والے تِیرہ بختوں کی
سلام اے بھرنے والے جھولیاں اپنے فقیروں کی
سلام اے قبلۂ حاجات، اے دولت غریبوں کی
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
سلام اے مالک و مختارِ جنت رات دن تم پر
سلام اے صاحبِ تاجِ شفاعت رات دن تم پر
سلام اے سرورِ ملک نبوت رات دن تم پر
سلام اے نوشۂ بزمِ رسالت رات دن تم پر
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ
درودیں آپ پر اَے لامکاں عرشِ عُلٰی والے
درودیں آپ پر قَوسَین والے اور دنیٰ والے
درودیں آپ پر والشمس والے والضحٰی والے
درودیں آپ پر مَازَاغ والے ماطغٰی والے
فلک بے مہر‘ طالع نارسا، دل وقفِ حیرانی
مدد اے آمنہ﷞ کے لال اے محبوبِ سبحانیﷺ

فریادِ مجسّم

قصۂ کرب و اذیّت کیا کہوں ، کیوں کر کہوں
مضطرب دل کی حقیقت کیا کہوں، کیوں کر کہوں
ہر سکوں ہے نذرِ کلفت کیا کہوں، کیوں کر کہوں
لُٹ گیا سامانِ راحت کیا کہوں، کیوں کر کہوں
داستانِ شامِ غربت‘ کیا کہوں، کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
میں گرفتارِ حوادث ہوں، کبھی صیدِ  اَلَم
مبتلائے دردِ پیہم ہوں، کبھی نخچیرِ غم
جاں گُسل حالات سے رہتا ہوں اکثر چشمِ نَم
توڑتی رہتی ہے مجھ پر گردشِ دوراں ستم
اپنی رودادِ مصیبت‘ کیا کہوں، کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
ناگہانی آفتیں لحظہ بہ لحظہ ہیں فزوں
مِٹ چکا ہے اب کتابِ دل سے عنواں سکوں
ہوچکا اِک ایک ایوانِ مسّرت سرنگوں
زیست کا ہر سانس اب ہے حاملِ سورِ دروں
دن ہے محشر‘ شب قیامت کہا کہوں‘ کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
ہر خوشی کے رُخ پہ اب رنج و محن کی گرد ہے
ہر تبسّم کی کلی کا غم سے چہرہ زرد ہے
ہر سکوں میں اِک پیامِ اضطرابِ درد ہے
ہر نَفَس گویا بجائے خود اِک آہِ سرد ہے
لُٹ گئی بزمِ مسرّت، کیا کہوں، کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
غم سے خالی کوئی بھی ساعت نظر آتی نہیں
یک نَفَس آرام کی صورت نظر آتی نہیں
کوئی شَے دنیا میں جز کلفت نظر آتی نہیں
زندگی میں اب مجھے راحت نظر آتی نہیں
میں ہوں وہ برگستہ قسمت‘ کیا کہوں‘ کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
ایک محرومِ کرم، محرومِ سایا، ہوں حضورﷺ
بخت کا مارا، زمانے کا ستایا ہوں حضورﷺ 
روح افسردہ، شکستہ قلب لایا ہوں حضورﷺ
بن کے فریادِ مجسّم در پہ آیا  ہوں حضورﷺ
آپ پر روشن ہے حالت‘ کیا کہوں‘ کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
ٹھوکریں کھاتا رہوں آخر کہاں تک دَر بَدر
ہے کوئی پُرسانِ غم میرا نہ کوئی چارہ گَر
سوئے دَر ہے اب نگاہِ آرزو آٹھوں پہر
یا حبیبی یا رسول اللہﷺ بَرمَن یک نظر
اب نہیں کہنے کی طاقت کیا کہوں، کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
نوشۂ بزمِ دَنیٰ، اَسْریٰ کے دولہا آپﷺ ہیں
صاحبِ قَوسَین، سلطانِ تدلّٰی آپﷺ ہیں
والضحٰی والشمس ہیں یٰس و طٰہٰ آپﷺ ہیں
نورِ حق ہیں‘ نور سر تا پا ہیں‘ کیا کیا آپﷺ ہیں
مہر بَر لب ہے شریعت‘ کیا کہوں‘ کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں
حاضرِ در ہے گدائے بابِ رحمت آپﷺ کا
اختؔرِ مدّاحِ سلطانِ رسالت آپﷺ کا
خاطئ و عاصی ہے یہ غرق ندامت آپﷺ کا
کچھ بھی ہے لیکن بہر صورت ہے، حضرت آپﷺ کا
آپ سے پھر بھی ہے نسبت‘ کیا کہوں‘ کیوں کر کہوں
اے حبیبِ عرش رفعتﷺ‘ کیا کہوں‘ کیوں کر کہوں

قدموں میں بُلا لیجئے

آنکھیں ہیں مِری تشنۂ دیدارِ مدینہ
ہر وقت تصوّر ہیں انوارِ مدینہ
فردوسِ نظر ہیں در و دیوارِ مدینہ
ہے شوق زمیں بوسئ دربارِ مدینہ
لِلّٰہ کرم احمدِ مختارِﷺ مدینہ
قدموں میں بلا لیجئے سرکارِﷺ مدینہ
ہے وادئ بطحا کا جو سودا مِرے سَر میں
ہر دم خلِش ہجر سے ہے درد جگر میں
لاتا ہے جنوں مجھ کو اسی راہ گذر میں
رہتا ہے بہر کیف شب و روز نظر میں
وہ دشتِ عرب اور وہ گلزارِ مدینہ
قدموں میں بلا لیجئے سرکارِﷺ مدینہ
اِک لمحہ کی فرقت بھی نہیں دل کو گوارا
چمکے مِری تقدیر کا اے کاش ستارا
اے شاہِ امم کاش کبھی ہو یہ اشارا
جی بَھر کے کروں گنبدِ خضریٰ کا نظارا
ہر وقت رہوں حاضرِ دربارِ مدینہ
قدموں میں بلا لیجئے سرکارِﷺ مدینہ
اے کاش حقیقت یہ مرا خوابِ حسیں ہو
پوری یہ تمنّا مِری اے سرورِ دیں ہو
دل محوِ زیارت ہو تو سجدے میں جبیں ہو
جب آئے مجھے موت مدینے کی زمیں ہو
ہوں سایہ فگن قبر پہ اشجارِ مدینہ
قدموں میں بلا لیجئے سرکارِﷺ مدینہ
مشتاقِ زیارت کو کبھی دید بھی ہوگی
کیا شامِ اَلَم کی سحرِ عید بھی ہوگی
اس نغمۂ پُر درد کی تائید بھی ہوگی
پوری یہ دلِ زار کی امید بھی ہوگی
سلطانِ عرب، سیدِ ابرارِ مدینہﷺ
قدموں میں بلا لیجئے سرکارِﷺ مدینہ
مانا کہ گنہگار و سیہ کار ہے اختؔر
سرکارِ رضؔا کا سگِ دربار ہے اختؔر
مجبور ہے، محتاج ہے، نادار ہے اختؔر
تھوڑی سی تجلّی کا طلبگار ہے اختؔر
خورشیدِ مبیں، بدرِ ضیا بارِ مدینہ
قدموں میں بلا لیجئے سرکارِﷺ مدینہ

عیدِ نُور

ساقی مجھے وہ بادۂ کیف و سرور دے
دے حسن جو دماغ کو اور دل کو نور دے
روشن ہو جس سے ذہن وہ جامِ شعور دے
کوثر کی روح آج مِلا کر ضرور دے
مستی سی روح و قلب پہ چھائی ہوئی رہے
تا عمر جس کیف میں گم زندگی رہے
اُٹھی گھٹا وہ کعبہ کے پردوں سے جُھوم کر
وہ چھاگئی فلک پہ فضائیں گئیں نِکھر
ہے سرمدی سُرور کی بارش جہان پر
لا ایک جام اور پلا، ایک اور بھر
رِندوں کی آج عید ہے ، مستوں کی عید ہے
ساقی حرم کے بادہ پر ستوں کی عید ہے
لاوارثوں کی عید، یتیموں کی عید ہے
ٹوٹے دلوں کی، تیرہ نصیبوں کی عید ہے
مایوس و ناامید، غریبوں کی عید ہے
بیمار، بیکسوں کی، ضعیفوں کی عید ہے
ہے فیضیابِ رحمتِ پروردگار عید
یہ عید وہ ہے جس پہ تصدق ہزار عید
جنت کا ہے جواب گلستاں بنا ہوا
ہے چاندنی کا فرش چمن میں بچھا ہوا
غنچوں کا آبِ نور سے منہ ہے دُھلا ہوا
ہے عطرِ روحِ حُسن میں گُل بسا ہوا
ہے سامنے نگاہ کے نقشہ بہشت کا
ہوتا ہے صحنِ باغ پہ دھوکا بہشت کا
گم ہے سیاہ دَور، زمانہ ہے نور کا
عالَم تمام آج خزانہ ہے نور کا
پھر بلبلوں کے لب پہ ترانہ ہے نور کا
باہم دِگر زباں پہ فسانہ ہے نور کا
نوری سماں ہے عالَمِ صد کیف و نور ہے
کل کائنات غرقِ شرابِ سرور ہے
تاریکیوں کا دَور دلِ مضمحل گیا
چمکا نصیب گوہرِ مقصود مِل گیا
ملّت کے دل کا غنچۂ افسردہ کِھل گیا
ہستی کا چاک دامنِ امید سل گیا
وہ نورِ چشمِ آمنۂ﷞ پاکﷺ آگئے
دنیا میں آج سیّد ِ لولاکﷺ آگئے
ظلمت کدوں کو دہر کے اِک روشنی ملی
ہر مضمحل نگاہ کو تابندگی ملی
بیمار زندگی کو نئی زندگی مِلی
غم خوردہ و شکستہ دلوں کو خوشی ملی
فیضِ جمالِ ماہِ عرب آج عام ہے
مسرور و شاد کام زمانہ تمام ہے
دورِ سرور و کیف کی جلوہ گری ہوئی
کِشتِ امید سُوکھ چکی تھی، ہری ہوئی
زندہ ہے پھر ہر ایک تمنّا مَری ہوئی
ہے آج ہر فقیر کی جھولی بھری ہوئی
جاگے نصیب، روز مِلا عیدِ نور کا
صدقہ ہے یہ ولادتِ پاکِ حضورﷺ کا
سورج میں ‘ ماہتاب میں ‘ تاروں میں روشنی
گلزار میں، گلوں میں، بہاروں میں روشنی
قدرت کے دلنواز اشاروں میں روشنی
پھر آگئی تمام نظاروں میں روشنی
منظر نظر نواز، سماں بے نظیر ہے
روشن چراغِ حسنِ سراجِ منیر ہے
عہدِ سکوں و مہبطِ راحت ہے کائنات
جلوہ گہِ خلوص و محبت ہے کائنات
میخانۂ نشاط و مسرّت ہے کائنات
ہر خاص و عام کے لئے جنت ہے، کائنات
اب سلطنت ہے صاحبِ خلقِ عظیم کی
محبوبِ حق، جنابِ رؤف و رحیمﷺ کی
اللہ کے رسولﷺ، رسالت کا واسطہ
اے تاجدار، تاجِ شفاعت کا واسطہ
محبوبِ حق، نگاہِ محبت کا واسطہ
سرکار، روزِ عیدِ ولادت کا واسطہ
صدقہ رضؔا کا آج جو مانگوں وہی ملے
اختؔر کو اپنی کھوئی ہوئی زندگی ملے