عزت عرش و فلک پائے رسول عربی

عزت عرش و فلک پائے رسول عربی
عرش رحمٰن بنا جائے رسول عربی

سرمیں یا رب ہے سودائے رسول عربی
اور آنکھوں میں تجلائے رسول عربی

جن کے دل میں ہے تو لائے رسول عربی
کیوں نہ بھائے انہیں صحرائے رسول عربی

داغ عشق شہ دیں روزترقی پہ رہے
میری آنکھیں رہیں جو یائے رسول عربی

اس قد پاک سایہ نظر آتا کیوں کر
نور ہی نور ہیں اعضائے رسول عربی

تشنہ کامو تمہیں مژدہ کہ بروز محشر
جوش پر آگیا دریائے رسول عربی

عید ہو مجھ کو کہ دیکھوں کبھی دیدارِ خدا
اور کبھی صورت زیبائے رسول عربی

کیوں دکھاتا ہے تپش مہرِ قیامت ہم کو
دیکھ ہشیار کہ وہ آئے رسول عربی

اب برستی ہے شفاعت کی بھرن امت پر
بخشوانے کے لیے آئے رسول عربی

امتی و ردزباں تاج کرامت برسر
یوں شفاعت کے لیے آئے رسول عربی

کیوں نہ محشرمیں پریشان پھرے وہ کم بخت
جس کے سر میں نہیں سودائے رسول عربی

حکم ہوگا کہ اسے داخلِ جنت کرو
جس کے دل میں ہے تمنائے رسول عربی

زیر دامان نبی حشر میں ہم دیکھیں سیر
جب جلیں نار میں اعدائے رسول عربی

چشم صدیق سے دیکھے کوئی ان کی صورت
نور ہی نور نظر آئے رسول عربی

اپنی آنکھوں کو ملوں جان تصدق کردوں
دیکھوں گر نقش کفِ پائے رسول عربی

گر سوالات نکیرین سے وحشت ہومجھے
منہ سے نکلے کہ ہوں شیدائے رسول عربی

حورو غلماں و جناں کیوں نہ ہوں تیرے مشتاق
ہے وظیفہ مرا اسمائے رسول عربی

ہے تمنائے جمیل رضوی یا اللہ
میرا مسکن بنے صحرائے رسول عربی

قبالۂ بخشش