خدائی کے لائق سرداریا رب
خدائی کے لائق سردار، یا رب!
سبھی جز و کُل کا خبر دار، یا رب!
کروں کس سبب کا سہارا بھروسہ
توئی خضر سب کا مددگار، یا رب!
تِری رحمتوں کا ہزاروں کڑوڑوں
رواں ہے یہاں بحرِ زخّار، یا رب!
کروں کس زباں سے بھلا حمد تیری
زباں میں نہیں تاب ِ گفتار، یا رب!
دل افسردۂ تشنہ کام جاں ہوں
زباں خشک ہوں صورتِ خار، یا رب!
عطا کر مِری آرزوئے دلی کی
تمنّا سے دل کی خبردار، یا رب!
خبیر و علیم و سمیع اور ناظر
یہ سب وصف تیرے نمودار، یا رب!
نہیں تیرے اوصاف کی حدّ و غایت
کہاں تک کرے کوئی اظہار، یا رب!
توئی منعم و معطیِ ہر عطا ہے
کرے جود و بخشش بھی بسیار، یا رب!
مجھے بخش دے اے بڑے رحم والے
تِرا نام ستار و غفار، یا رب!
تِرے در سے محروم جائے نہ کافؔی
نہیں تجھ سوا یاور و یار، یا رب!
۔۔۔۔۔۔۔۔۔۔۔۔۔۔۔۔۔۔(دیوانِ کافؔی)
