لیلۃ القدرہے یاں جلوہ نما آج کی رات

لَیْلَۃُ الْقَدْرہے یاں جلوہ نما آج کی رات
صحرِ عید ہے یاں پردہ کشا آج کی رات

شب ِ قدر صحر عید کو یاں کیا رتبہ
ہے شبِ مولدِ محبوبِ خدا آج کی رات

گرم عترت تھے بہم اہلِ زمین وحشں و طیور
تہنیت گو تھے بہم اہلِ سما آج کی رات

ہے شگفتہ ہوائے طرب و عیش و سرور
غنچۂ خاطرِ اربابِ ولا آج کی رات

انبیا شیوہ تسلیم بجا لاتے ہیں
مولدِ صاحبِ لَوْلَاک میں آ آج کی رات

دنگ ہے پیرِ فلک چشم کواکب حیران
جلوہ گستر ہے یہ کچھ نور ضیا آج کی رات

دست مشّاطۂ قدرت نے لیا اپنا تھام
دیکھ اس عارضِ تاباں کی ضیا آج کی رات

صورت ِ سایۂ دیوار بزیرِ مولا
ہے شبِ قدر بھی سر گرمِ دعا آج کی رات

روئے پُر نور پہ وہ گیسوئے مشکیں کی بہار
ظلمتِ نور کا کیا رنگ لڑا آج کی رات

ہو کے موسیٰ سے بہم دست بغل و حدت میں
گر پڑے دیکھی جو مولا کی ضیا آج کی رات

روکشِ وادیِ ایمن ہے زمینِ مولا
کون آتا ہے یہاں پردہ جلا آج کی رات

بطفیلِ شبِ میلادِ نبیﷺ، اے کافؔی!
کیجیے عرض دعا ہاتھ اُٹھا آج کی رات
۔۔۔۔۔۔۔۔۔۔۔۔۔۔۔۔۔۔(دیوانِ کافؔی)