ہے جو اِس دل کا مُدَّعا، یا رب!
اپنی رحمت سے کر عطا، یا رب!
بَہ طُفیلِ نبی رسولِ کریمﷺ
ہو اِجابت مِری دعا، یا رب!
اب تو میں بے طرح تڑپتا ہوں
ہوں مِری مشکلیں روا، یا رب!
اور یہ بھی تیری جناب میں ہے
اب کفایت کی التجا، یا رب!
یعنی نظمِ نسیمِ جنّت میں
ہو گئی ہو جہاں خطا، یا رب!
اپنے پیارے حبیب کے صدقے
اُس خطا کو بھی بخشنا، یا رب!
مُونِسِ روزگارِ کاؔفی ہو
نعت و اَوصافِ مصطفیٰﷺ، یا رب!
...
شرف دے حج کا مجھے بہرِ مصطفیٰﷺ یاربّ
روانہ سُوئے مدینہ ہو قافلہِ یاربّ
دکھا دے ایک جھلک سبز سبز گنبد کی
بس اُن کے جلووں میں آجائے پھر قضا یاربّ
مدینے جائیں پھر آئیں دوبارہ پھر جائیں
اِسی میں عمر گزر جائے یاخدا یاربّ
مِرا ہو گُنبدِ خضرا کی ٹھنڈی چھاؤں میں
رسول پاکﷺ کے قدموں میں خاتمہ یاربّ
بوقتِ نزع سلامت رہے مرا ایماں
مجھے نصیب ہو توبہ ہے التجا یاربّ
جو ’’دیں کاکام‘‘ کریں دل لگا کے یا اللہ
اُنہیں ہو خواب میں دیدارِ مصطفیٰﷺ یاربّ
تِری محبت اُتر جائے میری نس نس میں
پئے رضا ہو عطا عشقِ مصطفیٰﷺ یاربّ
زمانے بھر میں مچا دیں گے دھوم سنّت کی
اگر کرم نے ترے ساتھ دیدیا یاربّ
نماز و روزہ و حج و زکوۃ کی توفیق
عطا ہو اُمّتِ محبوبﷺ کو سدا یاربّ
جواب قبر میں مُنکر نکیر کو دوں گا
ترے کرم سے اگر حوصلہ ملا یاربّ
بروزِ حشر چھلکتا سا جام کوثر کا
بدستِ ساقئِ کوثر ہمیں پلا یاربّ
بقیعِ پاک میں عطّار دفن ہو جائے
برائے غوث و رضا از پئے ضیا یاربّ