پیدا ہوئے رسول خدا مومنو صلوات

پیدا ہوئے رسولِ خدا ﷺ مومنو صلوات
اُس صاحبِ لَوْلَاک پہ ہر دم کہو صلوات

پیدا ہوئے وہ صاحبِ لَوْلَاک شاہ ِ دیں
کر عرض اُس جناب میں اور مدح گو صلوات

پیدا ہوئے وہ سیّدِ سادات مجتبیٰ
ہے امر جن کے واسطے کہتے رہو صلوات

پیدا ہوئے وہ باعثِ ایجادِ کائنات
حضرت کی جانِ پاک پہ اے دوستو صلوات

پیدا ہوئے وہ خاصۂ درگاہ ِ مصطفیٰ
یا رب! تِرے حبیب پہ ہر بار ہو صلوات

پیدا ہوئے وہ صاحبِ معراج و معجزات
دن رات اُس جہاں میں ہَدِیَّہ کرو صلوات

کافؔی ہے حَلِّ مشکلِ دارین کے لیے
اُس نام پر مدام لکھو اور پڑھو صلوات
۔۔۔۔۔۔۔۔۔۔۔۔۔۔۔۔۔۔۔۔(دیوانِ کافؔی)