صل علی نبی کا نور شب ولادت

صَلِّ عَلٰی نبی کا نورِ شب ِ ولادت
تھا مخزنِ تجلّی نور ِ شبِ ولادت

مشرق سے تا بمغرب گہ گہ ہوئی تجلّی
ایسا چمک رہا تھا نورِ شبِ ولادت

موسیٰ بھی منتظر ہیں اُس نور کی جھلک کے
افسوس پر نہ پایا نورِ شبِ ولادت

کسریٰ کے قصر پر تھا اک زلزلہ نازل
واں برق بن کے چمکا نورِ شبِ ولادت

کونین ہے منوّر اُس نور کے سبب سے
ہے نورِ عالم آرا نورِ شبِ ولادت

بصرہ کے قصر دیکھے کچھ ایسے آمنہ نے
ایسا تھا جلوہ فرما نورِ شبِ ولادت

ادریس اور عیسیٰ تھے مانگتے دعائیں
ہم دیکھیں مصطفیٰ کا نورِ شبِ ولادت

فارس میں مدّتوں سے آتش جو شعلہ زن تھی
بجھ ہی گئی جو دیکھا نورِ شبِ ولادت

ہنگامِ ذکرِ مولِد گر دل لگا کے دیکھو
کرتا ہے ولہ جلوہ نورِ شبِ ولادت

کانپا تھا لَات و عُزّا اور سرنگوں چہل تھا
ہیبت یہ ساری لایا نورِ شبِ ولادت

جب مولدِ نبی کی پڑھتی رہی روایت
پیشِ نظر ہے گویا نورِ شبِ ولادت

یہ محفلِ نبیﷺ ہے مولِد کی خوشی ہے
مومن کو ہے ہنسایا نورِ شبِِ ولادت

انوارِ خیر و برکت آثارِ امن و راحت
دکھلا رہا ہے کیا کیا نورِ شبِ ولادت

اِنکارِ بزمِ مولِد ہے جس کسی کا مذہب
ہے اُس کی جاں پہ شعلہ نورِ شبِِ ولادت

امداد روز بد میں تاریکیِ لحد میں
کافؔی کا ہے وسیلہ نورِ شبِ ولادت
۔۔۔۔۔۔۔۔۔۔۔۔۔۔۔۔۔۔(دیوانِ کافؔی)