سید کائنات خیر الانام
سیّدِ کائنات، خیر الانام
اُن کے اوپر ہزار بار سلام
طاقِ ایوانِ آفرینش کا
ہے اُنھیں کے سبب قیام و نظام
بے نظیر و جہاں بَہ حسنِ جمال
بے مثالِ بشر بَہ خاص و عام
کیا لکھو ں نعت ِ صاحب ِ لَوْلَاک
عقل و دانش ہے قاصر و نا کام
عینِ ایماں ہے آپ کی الفت
ہے یہی دین اور یہی اسلام
ذاتِ پاکِ شفیعِ محشر کا
ہے وسیلہ ہمیں بروزِ قیام
بہ جنابِ نبی حبیبِ خدا
ہدیۂ رحمت و دُرود و سلام
کشتۂ شوق، کاؔفی مشتاق
بھیج لیل و نہار صبح و شام
۔۔۔۔۔۔۔۔۔۔۔(دیوانِ کافؔی)
