شب ولادت حضرت میں تھی خوشی کی دھوم

شبِ ولادت ِحضرت میں تھی خوشی کی دھوم
تمام خلق میں تھی مولدِ نبی^ﷺ کی دھوم

پڑا تھا عالمِ ملکوت میں خوشی کا جوش
ملائکوں میں بہم تھی مبارکی کی دھوم

وُحوش و طَیر و مَلک گرمِ تہنیت تھے بہم
جہانِ کوہ و بیاباں میں تھی اُسی کی دھوم

ہر ایک غنچۂ گُل پر تھا جوشِ حُسنِ بہار
چمن چمن میں تھی شادی و خُرّمی کی دھوم

ظہورِ نورِ تجلّی شب ِ ولادت میں
اٹھا رہا تھا یہ عالَم میں روشنی کی دھوم

یہ سُن کے آمدِ اَنوارِ حُسنِ مصطفوی
فلک سرو میں ہے خورشیدِ خاوری کی دھوم

ازل سے تا بہ ابد اور زمیں پہ تا بَہ فلک
ہے اُس جناب کی ختمِ پیمبری کی دھوم

گری زمینِ مدائن پہ کنکری اُس کی
پڑی تباہی پہ ایوانِ کسروی کی دھوم

خزاں رسیدہ جو تھے برگ تھے وہاں اشجار
زبانِ حال سے تھی اُن پہ تازگی کی دھوم

زبانِ حال سے تھی اُن پہ تازگی کی دھوم
اُسی کے ساتھ تھی نامِ محمدی^ﷺ کی دھوم

جو دھوم دھام ہے حضرت^ﷺ کے نام کی کافؔی
جہاں میں ایسی ہوئی ہی نہیں کسی کی دھوم
۔۔۔۔۔۔۔۔۔۔۔۔۔۔۔۔۔۔(دیوانِ کافؔی)