زیارت گاہ عالم ہے مکان مولد حضرت

زیارت گاہ ِ عالَم ہے مَکانِ مولدِ حضرت
شعارِ اہلِ ایماں ہے بیانِ مولدِ حضرت

مدینے اور کعبے میں ہمیشہ یہ ہی چرچا ہے
ہوئی کیا خوب ثابت عزّ و شانِ مولدِ حضرت

ہوئی دریائے سادا خشک فارس کی بجھی آتش
ہُوا کیا کیا عیاں اعجاز آنِ مولدِ حضرت

ملی ہے بو لہب کو بھی جزا شادیِ مولِد کی
تمھیں کیا کچھ ملے گا، دوستانِ مولدِ حضرت

عجب کیا ہے کہ پائیں اِس خوشی میں جنّت الماویٰ
سبھی ہیں اہلِ محفل شادمانِ مولدِ حضرت

یقیں اہلِ عقیدت کو ہے ایسی ہی شہرت سے
رہے گا حشر تک باقی نشانِ مولدِ حضرت

ہوئے پیشیں تیرا سو پر میلادِ حضرت کو
وہی پُر نور ہے اب تک مکانِ مولدِ حضرت

وہاں تک سائلِ امن و اماں کا دخل رہتا ہے
جہاں رہتا ہے مذکورِ زبانِ مولد ِ حضرت

ہوا فتوائے علمائے عرب سے مسئلہ ثابت
اُٹھو تعظیم کو وقتِ بیانِ مولدِ حضرت

کہاں تک تو صلہ لے گا جنابِ حق تعالیٰ سے
بشارت تجھ کو ہو، اے مدح خوانِ مولدِ حضرت

بہ از کحلِ جَواہر ہے مِری آنکھوں میں، اے کافؔی!
اگر مل جائے خاکِ آستانِ مولد ِ حضرت
۔۔۔۔۔۔۔۔۔۔۔۔۔۔۔۔۔۔۔۔(دیوانِ کافؔی)