اک پھول نبی کے گلشن کا میرا سوہنا شاہ تراب الحق

اک پھول نبی کے گلشن کا، میرا سوہنا شاہ تراب الحق
وہ غوث کا دل وہ جان رضاِ میرا سوہنا شاہ تراب الحق

وہ ماہ رخ و رخشندہ جبیں، وہ مظہر شاہ مصلح الدیں
وہ منبع بحر جود و سخا، میرا سوہنا شاہ تراب الحق

وہ قائد اہلسنت ہے، وہ روح رواں ملت ہے
بے مثل خطیب شعلہ نوا، میرا سوہنا شاہ تراب الحق

سر چشمہ رشد و ہدایت بھی وہ مخزن علم و فضیلت بھی
وہ گنج متاع بیش بہا، میرا سوہنا شاہ تراب الحق

اک ذکر یہی محفل ، اک شور یہی منزل منزل
ہے راہبروں کا راہنما، میرا سوہنا شاہ تراب الحق

کیوں کیف نہ دل پر طاری ہو، جب شیخ کی مدحت جاری ہو
اور سامنے خود ہو جلوہ نما، میرا سوہنا شاہ تراب الحق

وہ راحت جانِ عالم ہے، وہ فیض رسانِ عالم ہے
خلقت کے لیے مصروف دعا، میرا سوہنا شاہ تراب الحق

ہیں اور بھی اہل فکر و نظر، ارباب طریقت میں نشترؔ
وہ سب سے الگ وہ سب سے جدا، میرا سوہنا شاہ تراب الحق

شاعر؛ شاعر اہلسنت ڈاکٹر رفیق نشتر