پارۂدل

قطعات

مجھے مولائے یکتا نے عطا کی ذوق یکتائی
ہوئی رشک ہجوم دوستاں یہ میری تنہائی
زمانے کی نظر میں گرچہ بیگانہ سہی اخؔتر
ہماری ہمدم ہستی ہے انداز شکیبائی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجھے معلوم کیا تھا ایسی ساعت آنے والی ہے
عروش شربہ انداز محبت آنے والی ہے
زمانہ تو زمانہ خویش ہوجائیں گے بیگانہ
فقط اک جان پر لاکھوں مصیبت آنے والی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تملق مہربانوں کی سمجھ پایا نہ تھا اخؔتر
بہاریں گود میں پنہاں کئے ہیں لشکر صرصر
خرد عاجز نظر خیرہ الٰہی ماجرا کیا ہے
نظر آتا ہے مجھ کو آستین لطف میں خنجر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زبوں چشم زمانہ میں میری رفتار ہے اخؔتر
گراں ترگوش دوراں پر مری گفتار ہے اخؔتر
صدا دے تو بغاوت ہے رہے خاموش تو باغی
رباب زندگی کا کش مکش میں تار ہے اخؔتر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غم و آلام میں آلودہ میری زندگانی ہے
فقط لاتقنظوا کی ایک امداد نہانی ہے
وفور غم ہے لیکن اپنے اطمینان کے صدقے
نظر میں ایسا ایسا حادثہ مثل کہانی ہے

قطعہ

سمجھ ہی میں نہیں آتی چمن والوں کی دانائی
جہاں پر چاہئے ماتم وہاں بجتی ہے شہنائی
چمن پر یہ اثر تیرا پڑا رنگ خود آرائی
نہ کوئی دلکشی باقی نہ کوئی زیب و رعنائی

دیوانِ شفاعت

قطعہ نعتیہ

یہ مانا میرے عصیاں کی نہیں ہے کوئی حد شاہا
مجھے تسلیم اپنی ہر خطا بے رد و کد شاہا
مگر تم چاہو تو ہر جرم، رحمت سے بدل جائے
کہ دیوانِ شفاعت میں تو ہے ایسی بھی مدشاہا

سرکار کی گلی میں

قطعہ نعتیہ

دنیائے رنگ و بو میں جلوہ طراز ہوجا
یعنی غبارِ راہِ شاہِ حجاز ہوجا
سجدے جبیں کے وقفِ درگاہِ ناز کردے
سرکار کی گلی میں جانِ نیاز ہوجا

دامانِ مصطفیٰﷺ

قطعہ نعتیہ

اتنا تو مرے سرور تقریب کا ساماں ہو
جب موت کا وقت آئے اور روح خراماں ہو
دنیائے تصور میں دربار ترا دیکھوں
سر ہو ترے قدموں پر، سر پر ترا داماں ہو

توبہ توبہ

قطعہ نعتیہ

بھروسہ ہے ہمیں تو شافعِ محشر کی رحمت کا
نہ ہوا ایماں جسے لَاتَقْنَطُوْ پر وہ کرے توبہ
امیدِ عفو و بخشش پر تو عصیاں کو خریدا تھا
تری رحمت سے میں مایوس ہوجاؤں ارے توبہ

کیا میں سہرا کہدوں

قطعہ

چھائیں رحمت کی گھٹائیں میں وہ سہرا کہدوں
بدلیاں جھومتی آئیں میں وہ سہرا کہدوں
عرش تک نعتِ محمدﷺ کے ترانے گونجیں
حوریں فردوس میں گائیں میں وہ سہرا کہدوں
عطر میں ڈوبی ہوئی آئے نسیم سحری
پھول برسائیں ہوائیں میں وہ سہرا کہدوں
عندلیبانِ چمن بھی مترنم ہوں خلیؔل
قمریاں جھوم کے گائیں میں وہ سہرا کہدوں

دلِ خلیل

جب عشق کا سودا مول لیا احباب سے رشتہ ٹوٹ گیا
وہ دل کی تمنا خاک ہوئی، وہ دامن عشرت ٹوٹ گیا
دل بھی تو خلیؔل خستہ کا شیشے سے زیادہ نازک تھا
صدمے جو پڑے تو مَول گیا، نظروں سے گرا تو پھوٹ گیا

شورداریگر

انقلاب دہر کی تصویر کیا؟
خواب کیا ہے؟ خواب کی تعبیر کیا؟
زندگی شوریدگی کا نام ہے
پھر مالِ شورِ دار و گیر کیا؟

وفا و خطا

دو چار خطاؤں کو خاطر میں نہ لانا تھا
اور میری وفاؤں کو دل سے نہ بھلانا تھا
تم اپنی نگاہوں سے بجلی ہی گرادیتے
مجھکو تو نہ نظروں سے اس طرح گرانا تھا

عشق

بیتاب ہے دل بے چین جگر اور منہ کو کلیجا آتا ہے
ماحول پہ وحشت طاری ہے جی آج مرا گھبراتا ہے
کیا یہ بھی کوئی بیماری ہے یا عشق اسی کو کہتے ہیں
تسکین جو کوئی دیتا ہے دل اور بھی بیٹھا جاتا ہے

الوداع

(حالات سے متأثر ہوکر)

ہر لمحہ سکونِ دل ہو جہاں اک ایسی منزل ڈھونڈینگے
طوفاں نہ جہاں پر کوئی اٹھے ہم ایسا ساحل ڈھونڈینگے
برتا ہے خلیؔل اپنوں کو بہت اب غیروں کو اپنائینگے
جس بزم میں سب بیگانے ہوں ہم ایسی محفل ڈھونڈینگے
(۱۵ محرم الحرام ۱۴۰۵؁ھ مطابق ۱۲ اکتوبر ۱۹۸۴؁ء بروز پنجشنبہ)

جبینِ نُور

ہے تختۂ گل، جبین عالی
پر نُور، صحیفۂ جمالی
ہے مصحفِ قدرتِ الہٰی
آئینۂ حکمت الہٰی

ابروئے پاک

ابرو ہیں کہ نور کی کماں ہیں
محراب سجود گاہِ جاں ہیں
عیدین کے دو ہلال انور
وَالنَّجْمِ اِذَا ہَویٰ کے مظہر