مصطفی ﷺ نے عطا جب علم کردیا ‘ جھپٹے کفار پر یوں علی ہر طرف
بابِ خیبر اکھاڑا پلٹ دیں صفیں‘ دشمنوں میں پڑی کھلبلی ہر طرف
خوف سے خشک تھے دشمنوں کے گلے ‘ توڑے یوں آپ نے دائرے کفر کے
آپ کے نام سے ان کے حلقوں میں ہے آج بھی لرزش و تھرتھری ہر طرف
(اکتوبر ۱۹۹۵ء)
علم و عمل کی دنیا حافظ اجڑ گئی ہے
فرماگئے جو رحلت مفتی خلیل صاحب
تاریخ وصل ان کی ہاتف نے یوں بتائی
ہاں لکھ مکینِ جنت مفتی خلیل صاحب
(۱۹۸۵ء)
ہیں یہ امین دین رسالت پناہ کے
اقلیم معرفت کے یہی تاجدار ہیں
حاؔفظ یہ جن کے فیض سے روشن ہے میرا دل
شمع علی ہیں آل شہ ذی وقار ہیں
مذکورہ قطعہ‘ درگاہ سخی سیدنا عبدالوہاب شاہ جیلانی رحمتہ اللہ علیہ کی تعمیر نو کے وقت کہا گیا‘ اور یہ شرف عطا ہوا کہ حضرت کے دربار میں ‘ مرقد منور کی زینت بنا ۔ یہ قطعہ ’’برکات محل‘‘ میں شامل ہو نے سے رہ گیا تھا ‘ حتی کہ حصہ منقبت کی تمام کا پیاں تیار ہوگیئں ‘ لیکن یہ آخری صفحہ خالی تھا ۔ حضرت کی کرامت سے اچانک القاء ہوا کہ یہ قطعہ دیوان میں شامل نہیں ہوسکا ہے۔ فوری طور پر اسے دربارشریف سے نقل کروایا اور اس آخری صفحہ پر لگایا ۔ مگر دل میں اس بے ترتیبی پربے چینی رہی تو حضرت نے دوسرا القاء فرمایا کہ ’’برکات محل‘‘ کا پہلا صفحہ ہمارے نام سے شروع کیا ہے ‘ تو ختم بھی ہمارے نام پر کرو ‘ اس خیال سے دل مطمئن ہوا۔ اس طرح حصہ حمد ‘ نعت ‘ منقبت ‘ حضرت کے ذکر پر پورا ہوا۔ اور اس سے یہ نیک فال لی کہ ان شاءاللہ مقبول ہے ۔
فقیر قادری برکاتی غفرلہ مولف’’برکات محل‘‘
...
اچھا اک امر ہے کوئی حمد خدا کرے
یا وصف خاص سرور ہر دوسرا کرے
جو چاہے قرب خاص شہ لامکان کا
اخؔتر تمہارا ’’نعت محل‘‘ وہ پڑھا کرے
(ربیع الاول ۱۳۹۵ھ)
انجمن اصلاح کے جملہ اراکین کو سلام
ہورہا ہے جن کی محنت سے نبیﷺ کا ذکر عام
جو کوئی پیارے نبی ﷺ کے نام پر قربان ہو
ہے دعا مولیٰ سے حاؔفظ ان کا ہو اونچا مقام
خوشیاں منا رہے ہیں سرکار کی سب ہی تو
سرکار کا ترانہ ہے پاسباں ہمارا
گولی کے سایے میں ہم پل کر جواں ہوئے ہیں
گنبد ہرا ہرا ہے قومی نشاں ہمارا
موجودہ زمانے میں چمچوں کی بن آئی ہے
یہ وہ ہیں کہ تا ’’مطبخ‘‘ ان کی ہی رسائی ہے
دعوت بھی جو ملتی ہے ان کے ہی وسیلے سے
احباب کا کہنا ہے ’’یہ اپنی کمائی ہے‘‘
(۲۵ ذی الحجہ ۱۳۹۲ھ)
کوئی تو مرغیاں کھاتا ہے دو دو پونڈ کی ہر دن
کوئی بیٹھا ہے لیکر دال ‘ دستر خوان پہ شرماتا
فقط بکرا ہی کاٹا تھا تو کیوں احباب کہتے ہیں
عوض میں کھال کے چاول نہ تو لاتا تو پچھتاتا
(۲۰ محرم ۱۳۹۳ھ)
کوئی بھی کام جمہوری ‘ حکومت میں تری آمر
نہیں ایسا ہوا ہر گز کہ ڈھونڈا ہم نے جب پایا
بنا ہے صدر تو جب سے عجب طوفان برپا ہے
اسے پکڑو اسے مارو یہی شور و شغب پایا
(اس وقت کے صدر پاکستان ’’بھٹو‘‘ ۱۹۷۳ء)
...
سَ سَ سَرْو کے دَ دَرخت پر
قَ قَ قُمریاں قَ قَ قُوں کریں
صَ صَ صُبح کو مَ مَ مَدرسہ میں
گَھ گَھ گھنٹیاں ٹَ ٹَ ٹُوں کریں
(۲۰ جمادی الاولیٰ ۱۳۹۲ھ)