قطعات  

حمد

ذرے ذرے سے نمایاں ہے مگر پنہاں ہے
میرے معبود! تیری پردہ نشینی ہے عجیب
دور اتنا کہ تخیل کی رسائی ہے محال
اور قربت کا یہ عالم کہ رگِ جاں سے قریب

جو ہو ممدوح خود اپنے خدا کا
بھلا کوئی کرے اُس کی ثنا کیا؟
اُنھیں میری حقیقت کا پتہ ہے
مجھے ان کی حقیقت کا پتہ کیا؟

قطعہ

منم مرزوق تو رزق الہی
سرشت ذات تست عالم پناہی
خوشا بندہ نواز ماغریباں
سلامت بادایں رحمت نگاہی
انااامرزوق واللہ تعالیٰ
ھو الرازق لکل العالمین
واجلسک علی عرش الکرامۃ
وفتح بابک للسائلین
کفی بالفضل انہ قد اقام
کاسمک رزقہ للمستعین
علینا الا متنان علی التوالی
لمن بعث سراج الغوث فینا
نظر کو نور دیا دل کو تازگی بخشی
جسے زوال نہ آئے وہ زندگی بخشی
کرم تو دیکھو در پاک پر طلب کرکے
جو انکی شان کے لائق تھی شئی وہی بخشی

قطعہ

ان کا نقش قدم پا گئے
گویا منزل کو ہم پا گئے
اخؔتر اب اور کیا چاہئے
ان کی فرقت کا غم پاگئے

قطعہ

دیکھا ہے چشم چرخ نے لیلیٰ کو بھی شیریں کو بھی
یوسف کو بھی پایا حسین لیکن نہیں تم سا حسین
اخؔتر منقش آسماں یہ شمس یہ نجم و قمر
بس عکس حسن یار ہے اسکے سوا کچھ بھی نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کاروان غم کی خونیں داستانوں کی قسم
کربلا کے بھوکے پیاسے میہمانوں کی قسم
ہے نہاں قتلِ حسینی میں حیات جاوداں
برلب جوئے رواں پیاسی زبانوں کی قسم

نظم گلشن دیکھ، آئین چمن بندی تو دیکھ
پھول کے پہلو میں خاروں کی برومندی تو دیکھ
اور وہ زیب چمن یعنی شمیم جاں فزا
رہ نہیں سکتی چمن میں اُف یہ پابندی تو دیکھ

دیکھ تو داغ عیاں ناسور پنہانی نہ دیکھ
مجھ کو حیراں دیکھ لیکن وجہ حیرانی نہ دیکھ
ہوش میں آ اے مرے دنیائے دل کے محتسب
اپنا دامن دیکھ میری چاک دامانی نہ دیکھ

رات والے حامئ انوار ہوسکتے نہیں
جوہوں بدطینت وہ خوش اطوار ہوسکتے نہیں
ان خدایان چمن کو کیسے سمجھائے کوئی
عصمت گل کے محافظ خار ہوسکتے نہیں

ناپاک دست و پاکی ناپاک حرکتوں سے
مٹی میں مل گیا ہے ’’عزت‘‘ کا جل کے خرمن
دوشیزۂ شرافت آوارہ ہوگئی ہے
بھٹکا ہوا ہے آنچل بہکا ہوا ہے جوبن