پشتو طرز میں نعتِ سرکارﷺ

ہر لمحہ جہاں پر ہو فرشتوں کا پڑاؤ
ایسا ہو کوئی اور اگر در تو بتاؤ
حاصل ہو جسے بھی غم سرکار کی نعمت
رکھتا ہے کہاں پر وہ زمانے سے لگاؤ
وہ جس کا عالم ہے کہ اب جاں پہ بنی ہے
اس سمت بھی رخ شہر مدینہ کی ہواؤ
مطلوب ہے گر میری شفا تم کو طبیبو
دَھْووَنْ مجھے سرکار کے قدموں کا پلاؤ
اک ذَرّہ نہ دوں خاکِ کفِ پائے نبی کا
ہے ہیچ نگاھوں میں جو کونین بھی لاؤ
حاؔفظ یہاں دیوانے ہیں سرکار کے جو بھی
آتی نہیں ان کو کبھی طوفان میں ناؤ
(جون ۱۹۹۳ء)

اَغِثْنِیْ یَارَسُولَ اللہِﷺ

عمل پہ اپنے حیراں ہوں اَغِثْنِیْ یَارَسُولَ اللہ ﷺ
پریشاں ہوں پریشاں ہوں اغثنی یا رسول اللہ ﷺ
پڑا ہوں معصیت میں نام کی نیکی نہیں لیکن
تمہارے دم پہ نازاں ہوں اغثنی یارسول اللہ ﷺ
ذرا جلوہ دکھا دیجۓ نزع کا وقت ہے آقا
بس اب لمحوں کا مہماں ہوں اغثنی یارسول اللہ ﷺ
شفاعت آپ کی ہی روز محشر کام آۓ گی
اسی رحمت پہ فرحاں ہوں اغثنی یارسول اللہ ﷺ
ہیں مُنْکَرْ اور نَکِیْر آۓ لحد میں پوچھنے مجھ سے
سوالوں سے میں لرزاں ہوں اغثنی یارسول اللہ ﷺ
فقیر قادری میں ہوں تہی دست و تہی داماں
تمہارےدر پہ گریاں ہوں اغثنی یارسول اللہ ﷺ
در اقدس کی قربت ہے دوا بیمار فرقت کی
مریض مرض ہجراں ہوں اغثنی یا رسول اللہ ﷺ
سلاطین ہو کے بھی ان کو میسّر کب  یہ نعمت ہے
میں منگتا ہو کے شاداں ہوں اغثنی یارسول اللہ ﷺ
نگاہیں آپ کے حاؔفظ کی ہیں اب روۓ تاباں پر
میں محو دید قرآں ہوں اغثنی یارسول اللہ ﷺ
(۲۲ اکتوبر ۱۹۹۵ء)

رحمت کی کیاری

کہیں بھی زندگی میں چین وہ پایا نہیں کرتے
جو بدقسمت در محبوب پر جایا نہیں کرتے
چُنے لَاتَقْنَطُوْا کے گُل جو رحمت کی کیاری سے
ہمیشہ تر ہی رہتے ہیں یہ مرجھایا نہیں کرتے
مرے آقا سے جو مانگو عطا فرماہی دیتے ہیں
ذرا بھی میل اپنی  آنکھ  میں لایا نہیں کرتے
بڑھاؤ جھولیاں اپنی نبی سے مانگنے والو
کہ اس در کے جو سا ئل ہیں وہ شرمایا نہیں کرتے
تمہارے چاہنے والوں کا عالم ہی نرالا ہے
زمانے میں کسی سے خوف وہ کھایا نہیں کرتے
نہ آزردہ نہ آشفتہ ہو ہرگز اُمّتِ عاصی
کہ آقا لطف کرتے ہیں غضب ڈھایا نہیں کرتے
گنہگاران امت کو جو مژدہ مل گیا حاؔفظ
’’نبی شَافِعْ مُشَفَّعْ‘‘ ہیں تو گھبرایا نہیں کرتے
(نومبر۱۹۷۴ء)

تجلئیِ ماہ مدینہ

(بموقع طرحی مشاعرہ دارالعلوم امجدیہ کراچی)

جس کی کہیں مراد نہ پوری ہوا کرے
آئے در حبیب پہ وہ التجا کرے
دھندلا چکا ہے آیئنہ روئے کائنات
’’ماہ مدینہ اپنی تجلی عطا کرے‘‘
دامِ فریبِ میں نفس میں ہے مُرغِ دل اسیر
مشکل کشائی ناخُنِ عُقْدہ کُشا کرے
معجز نمائیِ لبِ عِیْسٰی ‎بجا  ۔۔۔۔۔ مگر
جو آپ کا مریض ہو وہ کیوں دوا کرے
آنکھوں سے اشک روز بہیں تیری یاد میں
اے کاش روز جشن چراغاں ہوا کرے
ہے رحمت خدا کی نظر چشم ناز پر
رخ دیکھئے کدھر نگہ مصطفی ﷺ کرے
میں سوز عشق سرور کونین ﷺ کے نثار
ٹھنڈی نہ ہو یہ آتش رحمت خدا کرے
خم ہو جو ان کے در پہ تو پھر سر نہ اٹھ سکے
ہو ختم زندگی کا سفر یوں خدا کرے
حاؔفظ جو چاہتا ہے کوئی قرب کبریا
آٹھوں  پہر درود نبی ﷺ پر پڑھا کرے
(مطبوعہ: ماہنامہ ماہ طیبہ سیالکوٹ اکتوبر ۱۹۷۰ء)

ایک اردو نظم کی پشتو طرز سے متاثر ہوکر نعت کہی

تجھ کو قسم ہے زائر
آنا نہ ہاتھ خالی
طیبہ کو جانے والے
میں بھی ہوں اِک سوالی

کہنا مِرے آقا سے
مولائے مدینہ سے
اُس جانِ تمنا سے
یعنی مرے داتا سے
سرکار میرے والی
میں بھی ہوں اک سوالی

یہ کہنا وہاں جا کر
اک آہ ذرا بھر کر
اے آقا ذرا مجھ پر
للہ کرم بھی کر
آیا ہوں ہاتھ خالی
میں بھی ہوں اک سوالی

اب سندھ کے سینے میں
کیا رکھا ہے جینے میں
پہنچوں جو مدینے میں
شہروں کے نگینے میں
چوموں گا اُن کی جالی
میں بھی ہوں اِک سوالی

اللہ رے ترا گفتہ
اشعار کا گلدستہ
اے حاؔفظ آشفتہ
اب ہو جا کمر بستہ
تو نے مراد پالی
میں بھی ہوں اِک سوالی
(اکتوبر ۱۹۷۲ء)

صدقہ رسول ﷺ

آفتاب آگیا ماہتاب آگیا ‘ غمزدہ دل سکوں سے ٹھہر جائیں گے
گرمئی روز محشر سے گھبرائیں کیوں ‘ ان کے صدقے یہ لمحے گزر جائیں گے
اور کچھ دیر آہ و فغا ں کا ہے شور‘ تشنہ کامی کے لمحے گزر جائیں گے
میرے آقا کو کوثر پہ آنے تو دو ‘ جتنے خالی ہیں سب جام بھر جائیں گے
مثردہ جَاؤُکْ کا عاصیوں کو ملا ‘ اب تو سب کے مقدر سنور جائیں گے
اپنا سویا مقدر بھی جاگے گا اب ‘ طیبہ لَارَیْبْ شام وسحر جائیں گے
اے دو عالم کے آقا حبیبِ خداﷺ‘ میرے ماں باپ بھائی ہوں تم پر فدا
رَبِّ سَلِّمْ کا سایہ جو ہم پر رہے ‘ پل سے ہم وَجْد کرتے گزر جائیں گے
بحر عصیاں میں ہیں غرق عصیاں شعار‘ تابہ ساحل پہنچنے کی طاقت نہیں
رحمتِ مُصْطَفٰیٰ ﷺ گر اشارہ کرے  غم میں ڈوبے ہوئے سب ابھر جائیں گے
تھام لے ان کا دامن جو حاؔفظ یہاں‘ بگڑی اس کی بنے گی یہاں اور وہاں
بس درود وسلام ان پہ بھیجا کرو ‘ خود بخود کام بگڑے سنور جائیں گے
(ستمبر ۱۹۷۱ء)

ایقان مومن

خود کو عشق مصطفےٰ ﷺ میں جو مٹاتے جائیں گے
وہ بہر لمحہ یقیناً چین پاتے جائیں گے
سَیّدِ کونین ﷺ سے جو لَوْ لگاتے جائیں گے
وہ خدا کو باخدا نزدیک پاتے جائیں گے
جو نبی ﷺ کے عشق میں جلتے ہیں یاں پروانہ وار
وہ بروز حشر ہر دم جگمگاتے جائیں گے
خود بخود چومیں گی آکر منزلیں ان کے قدم
 ان کے نقش پاپہ جو سر کو جھکاتے جائیں گے
نزع کے عالم میں جب جلوہ دکھائیں گے حضورﷺ
اپنی اپنی لحد میں ہم مسکراتے جائیں گے
ٹھنڈے ٹھنڈے میٹھے میٹھے بھر کے وہ کوثر کے جام
ہم تو پیتے جائیں گے اور وہ پلاتے جائیں گے
جب سر محشر سنیں گے رَبِّ سَلِّمْ کی صدا
ان کے عاصی نعت پڑھتے گنگناتے جائیں گے
کوئی بھی پُرساں نہ ہوگا حشر میں حاؔفظ مگر
میرے آقا عاصیوں کو بخشواتے جائیں گے

نعت سَیُّداْلَابْرارﷺ

اللہ اللہ کتنا عالی مرتبت دربار ہے
ہر طرف انوار کی یلغار ہی یلغار ہے
سُینّو مُثردہ کہ ساماں مغفرت کا ہوگیا
شافع محشر نبی ﷺ ہیں اور خدا  غَفَّار ہے
 دل کھنچے جاتے ہیں اس آواز پر پروانہ وار
کتنی دلکش کیسی شیریں آپ کی گفتار ہے
حشر میں کل ڈھونڈ لیں گی اس کو حق کی رحمتیں
جس کے لب پر آج نعتِ سید الابرار ﷺ ہے
حاؔفظ اب تجھ پر نہ ہو کیوں غوثِ اعظم کی نظر
تو بھی اک ادنی غلامِ احمدِ مُختارﷺ ہے
(اگست ۱۹۷۱ء)

!کیا کہییے

قرآن مکمل سیرت ہے یہ شان رسالت کیا کہیئے
فاران کی چوٹی سے چمکا خورشید ہدایت کیا کہیئے
رہتی ہے تخیّل میں میرے اک چاند سی صورت کیا کہیئے
دل سوئے مدینہ ہوتا ہے ہوتی ہے عبادت کیا کہیئے
وہ بھیک عطا کر دیتے ہیں سائل کو طلب سے بھی پہلے
اس پاس بلانے والی کی یہ رحمت و شفقت کیا کہیئے
اَدْنٰی سا اشارہ پاتے ہی جب چاند بھی ٹکڑے ہوتا ہے
اس چاند کی طاعت کیا کہیئے اس نور کی طاقت کیا کہیئے
ڈوبا ہوا سورج بھی پلٹا واللہ جو پایا حکمِ نبیﷺ
ہے فرش سے تابا عرش بریں آقا کی حکومت کیا کہیئے
سرقدموں پہ خم ہیں شاہوں کے کونین ﷺتصرف میں اس کے
جو ان کے گدا کو حاصل ہے وہ شان اور شوکت کیا کہیئے
گلزار محمد ﷺ کی ہیں کلی بو بکر ﷜ و عمر ﷜ عثمان﷜و علی﷜
پھیلے نہ زمانے میں کیسے ان کلیوں کی نکہت کیا کہیئے
کیا میری زباں کیا میرا قلم سب ان کا کرم ہےاے حاؔفظ
ہوں بزم سخن میں نغمہ سرا ‘ اللہ رے قسمت کیا کہیئے
(ماہ طیبہ ‘ جنوری ۱۹۷۰ء)

کعبئہ نور ﷺ

جانِ جاں تیری طلب میں جسے موت آئی ہے
بخدا اس نے حیاتِ اَبَدِی پائی ہے
تیرے ہر ناز کی قرآں نے قسم کھائی ہے
تیرے رب کو تری اک اک ادا بھائی ہے
زُلف کب اس رخ روشن پر یہ لہرائی ہے
کعبئہِ نور پر رحمت کی گھٹا چھائی ہے
جستجو چاند کو تیری ‘ تیری سورج کو تلاش
ایک ہم کیا ہیں زمانہ تیرا شیدائی ہے
لوٹتا ہے کوئی قدموں پہ ‘ کوئی دامن پر
حشر میں آج گنہگاروں کی بن آئی ہے
یہ شگوفوں کا تبسم یہ ہنسی کلیوں کی
تیرے جلووں کی یہ سب انجمن آرائی ہے
میرے عصیاں مجھے لے آئے ہیں آقا کے حضورﷺ
ساتھیو! کتنی مبارک مری رسوائی ہے
چمنِ دل کا ہر اک پھول ہے فردوس بکف
تیری یاد آئی ہے یا آج بہار آئی ہے
باتوں باتوں میں چھڑی ہے تیری زلف کی بات
دیکھتے دیکھتے رحمت کی گھٹا چھائی ہے
آپﷺ کی یاد ہے ‘ آنسو ہیں ‘ شب ہجراں میں
بزم کی بزم ہے تنہائی کی تنہائی ہے
میں نے سر رکھ ہی دیا سنگ در اقدس پر
لوگ کہتے رہے دیوانہ ہے سودائی ہے
آج محشر میں ہے کس اوج پر حاؔفظ کا نصیب
دامن سرور عالم میں جگہ پائی ہے

(۲۳ صفر ۱۳۹۴ھ ‘ اکتوبر ۱۹۷۴ء برمشاعرہ دارالعلوم امجدیہ کراچی)