حضرت خطیب پاکستان علامہ حافظ محمد حافظ محمد شفیع اوکاڑوی
حضرت خطیب پاکستان علامہ حافظ محمد حافظ محمد شفیع اوکاڑوی، کراچی علیہ الرحمۃ
شہسوارِ خطابت، عمدۃ المحققین حضرت علّامہ مولانا حافظ محمد شفیع اوکاڑوی بن میاں کرم الٰہی، ۱۳۴۹ھ / ۱۹۳۰ء میں کھیم کرن(پنجاب) کے تجارت پیشہ گھرانے میں پیدا ہوئے گھر کا ماحول خالص دینی ہونے سے آپ کی تربیت مذہبی بنیادوں پر ہوئی۔
آپ نے قرآن پاک حافظ کرم الٰہی(کھیم کرن) سے حفظ کیا۔ ابتدائی اردو، فارسی، عربی کی تعلیم اوائل عمر میں حاصل کی۔ تقسیمِ ہند کے وقت پاکستان کی طرف ہجرت کرکے اوکاڑہ ضلع ساہیوال میں سکونت اختیار کی اور علومِ اسلامیہ کی تعلیم میں منہمک ہوگئے۔
درسِ نظامی کی بعض کتب حضرت مولانا عبد الحق کیمبلپوری سے پڑھیں، جبکہ دیگر کتب فنون اور علم حدیث کے حصول کے لیے شیخ القرآن حضرت مولانا غلام علی اوکاڑوی کے سامنے زانوئے تلمذتہ کیا اور سندِ فراغت حاصل کی۔
فراغت کے بعد غزالیٔ زماں رازیٔ دوراں حضرت علامہ سیّد احمد سعید شاہ کاظمی مدظلہ العالی(صدر جماعت اہل سنّت پاکستان) کی خدمت میں حاضر ہوئے اور درسِ حدیث لے کر ۱۳۷۵ھ میں مدرسہ عربیہ انوار العلوم ملتان سے سندِ فراغت حاصل کی۔
علومِ اسلامیہ کی تکمیل کے بعد کچھ عرصہ جامع مسجد ساہیوال میں فرائضِ خطابت سر انجام دیتے رہے اور بعد ازاں کراچی تشریف لے گئے۔
خدا داد صلاحیتوں کی وجہ سے جلد ہی آپ کی خطابت کا شہرہ عام ہوگیا اور صبح و شام تبلیغی محافل کا انعقاد ہونے لگا۔ نہ صرف ملک کے اطراف و اکناف بلکہ بیرونِ ملک بھی آپ کے تبلیغی دورے شروع ہوئے اور یوں آپ نے اپنے حکمت بھرے مواعظِ حسنہ سے قلوب کو جلا بخشی اور گم گشتگانِ راہ ہدایت پانے لگے۔ آپ کی تقریر نہایت مؤثر اور جامع ہوتی ہے۔
غزالیٔ زماں حضرت علّامہ سیّد احمد سعید شاہ کاظمی مدظلۂ فرماتے ہیں: آپ کی تقریر علمی استعداد ذکاوت و ذہانت، جو دتِ طبع اور وسعتِ مطالعہ کی آئینہ دار ہوتی ہے۔ اندازِ بیاں نہایت سلجھا ہوا، کلام میں پختگی لطافت اور بسا اوقات ظرافت کی چاشنی پائی جاتی ہے جو سامعین کے لیے نہایت دلچسپ ہوتی ہے۔[۱]
[۱۔ سیّد احمد سعید کاظمی، علّامہ: تعارف مصنّف ’’ذکرِ جمیل‘‘]
آپ کی اس پُر اثر تبلیغ سے زمانہ حال کے خوارج وہابیہ، دیابنہ وغیرہ بوکھلا گئے، یہاں تک کہ آپ پر قاتلانہ حملہ کردیا، لیکن محافظِ حقیقی نے چونکہ آپ سے ابھی رشد و ہدایت کے سلسلہ میں کام لینا تھا، اس لیے مخالفین کو اس ناپاک منصوبے میں ناکامی کا منہ دیکھنا پڑا۔
حضرت علّامہ اوکاڑوی صاحب کئی بار حج بیت اللہ شریف اور زیارتِ گنبدِ خضرأ علی صاجہا الصّلوۃ والسّلام سے مشرف ہوچکے ہیں۔
سلسلۂ نقشبندیہ میں آپ کو روحانیت کے عظیم مرکز شر قپور شریف سے وابستگی کا شرف حاصل ہے عالمِ شباب میں آپ حضرت پیر طریقت میاں ثانی صاحب شرقپوری رحمہ اللہ کے حلقۂ ارادت میں شامل ہوئے اور پھر شیخ المشائخ حضرت مولانا ضیاء الدّین قادری مدظلہ العالی(مدینہ منوّرہ) سے سلسلۂ قادریہ کی خلافت و اجازت حاصل کی۔
۱۹۶۵ء کی پاک بھارت جنگ میں آپ حضرت علامہ عبد الحامد بدایونی رحمہ اللہ تعالیٰ اور دیگر قائدین اہلِ سنّت کی رفاقت و معیّت میں مختلف محاذوں پر تشریف لے گئے اور مہاجرین و متاثرین میں کپڑے، بستر او دیگر ضروری اشیاء تقسیم کیں۔
۱۹۷۰ء کے انتخابات میں کراچی سے آپ نے قومی اسمبلی کا انتخاب لڑا۔
حضرت علامہ محمد شفیع اوکاڑوی دیگر صلاحیتوں کے ساتھ ساتھ تصنیف و تالیف کے سلسلے میں بھی ایک امتیازی مقام رکھتے ہیں۔ آپ کی تصانیف مدلّل اور تحقیقی و تفتیش کا نہایت ہی عُمدہ مرقع ہیں۔ ان کی تحریر کی ایک خصوصیّت یہ بھی ہے کہ ان کے تمام تر تصلب کے باوجود تحریر میں شدّت نہیں ہے۔[۱]
[۱۔ غلام مہر علی، مولانا: ’’الیواقیت المہریہ‘‘ ص ۱۲۹]
آپ کے رشحاتِ قلم درج ذیل ہیں:
۱۔ ذکرِ جمیل (آنحضرت صلی اللہ علیہ وسلّم کی سیرت و صورت کا بیان)
۲۔ ذکر حسین (آنحضرت صلی اللہ علیہ وسلّم کی سیرت و صورت کا بیان)
۳۔ سعینۂ نوح (دو حصّے) (فضائلِ اہلِ بیعت)
۴۔ برکات میلاد شریف
۵۔ راہِ حق (انبیاء و اولیاء کو ندا کا جواز)
۶۔ ثواب العبادات الی ارواح الاموات
۷۔ درسِ توحید اپنے آئینہ میں (توحید کا صحیح مفہوم)
۸۔ راہِ عقیدت (مقاماتِ مقدسہ کا تفصیلی ذکر و فضائل)
۹۔ نغمۂ حبیب (معتبر علماء و شعراء کا منتخب نعتیہ کلام)
۱۰۔ نماز مترجم مع ضروری مسائل
۱۱۔ انگھوٹھے چومنے کا مسئلہ
۱۲۔ انوارِ رسالت رشاداتِ رسول کی روشنی میں بعض مسائل)
۱۳۔ ام پاک اور یزید پلید (حضرت امام حسین رضی اللہ عنہ اور یزید پلید کی سوانح کا تقابلی جائزہ)[۱]
[۱۔ محمد شفیع اوکاڑوی، مولانا: ’’ذکرِ حسین‘‘ ص ۲۱۴ تا ۲۱۶]
(تعارف علماءِ اہلسنت)