حضرت پروفیسر محمد مسعود احمد نقشبندی
حضرت پروفیسر محمد مسعود احمد نقشبندی نوابشاہ علیہ الرحمۃ
قدیم و جدید علوم کے جامع، عظیم محقق پروفیسر ڈاکٹر محمد مسعود احمد نقشبندی، مجددی ایم اے پی ایچ ڈی(پرنسپل گورنمنٹ کالج، سکرند ضلع نواب شاہ) بن مفتی اعظم حضرت مولانا محمد مظہر اللہ بن حضرت مولانا محمد سعید ابن اعلیٰ حضرت شاہ محمد مسعود(رحمہم اللہ تعالیٰ) دہلی میں پیدا ہوئے۔ آپ ایک عظیم علمی و روحانی خاندان کے چشم و چراغ ہیں۔ آپ کا سلسلۂ نسب متعدد واسطوں سے حضرت شیخ جلال الدین تھانیسری رحمہ اللہ سے جا ملتا ہے۔
آپ کے جدِّ اعلیٰ حضرت مولانا محمد مسعود نقشبندی مجددی(م ۱۰؍ رجب المرجب ۱۳۰۹ھ / ۱۸۹۲ء) انیسویں صدی کے آخر کے عظیم علماء و صوفیا میں سے تھے جنہوں نے اپنے علم و فضل اور روحانیت سے دہلی کی فضاؤں کو چالیس سال تک منوّر و مُستیز رکّھا۔
آپ کے والد حضرت مفتی اعظم مولانا محمد مظہر اللہ قدس سرّہ علومِ اسلامیہ کے یکتائے روزگار عالم ہو گزرے۔ شاہی جامع مسجد فتح پوری میں خطابت و امامت کے فرائض انجام دیتے رہے آپ مختلف علوم و فنون میں مہارتِ تامہ رکھتے تھے۔ ۱۴؍ شعبان المعظّم ۱۳۸۶ھ / ۲۸؍ نومبر ۱۹۶۶ء کو آپ نے اس دارِ فانی سے کوچ فرمایا۔[۱]
[۱۔ پروفیسر ڈاکٹر محمد مسعود احمد صاحب مدظلہ کے آباؤ اجداد کے مکمّل تذکرہ کے لیے ’’مذکرہ مظہر مسعود‘‘ مؤلّفہ جناب ڈاکٹر صاحب موصوف کا مطالعہ کیجیے۔ (مرتب)]
پروفیسر محمد مسعود احمد مدظلہ نے قرآن کریم اور عربی و فارسی کی ابتدائی کتابیں اپنے والد ماجد علیہ الرحمہ سے پڑھیں۔ ۱۹۴۰ء میں مدرسہ عالیہ مسجد فتح پوری دہلی میں داخلہ لیا اور باقاعدہ علومِ عربیہ کی تحصیل شروع کی۔ ۱۹۴۵ء میں آپ نے اورینٹل کالج مسجد پوری دہلی میں داخل ہوکر دو سال فارسی زبان و ادب کی تحصیل کی۔ ۱۹۴۸ء میں آپ نے مشرقی پنجاب یونیورسٹی(سولن) سے فاضل فارسی(منشی فاضل) کا امتحان پاس کیا۔
۱۹۴۸ء میں آپ اپنے برادر مولانا منظور احمد رحمہ اللہ کی تیمار داری کے سلسلے میں پاکستان تشریف لائے اور پھر مستقل یہیں کے ہوکر رہ گئے۔
حیدر آباد(پاکستان) میں آپ نے اپنی پھوپھی صاحبہ کے ہاں قیام فرمایا اور انہی کی جانب سے حوصلہ افزائی پر آپ نے سلسلۂ تعلیم جاری کیا۔ چنانچہ ۱۹۵۲ء میں آپ نے پنجاب یونیورسٹی لاہور سے میٹرک کا امتحان پاس کیا۔ ۱۹۵۳ء میں ادیب فاضل اور پھر ایف اے کا امتحان پاس کیا۔ ۱۹۵۶ء میں پنجاب یونیورسٹی سے بی اے کے امتحان میں کامیابی حاصل کی اور پھر اسی سال سندھ یونیورسٹی حیدرآباد میں داخلہ لیا۔
۱۹۵۸ء میں آپ نے ایم اے اردو کا امتحان نمایاں پوزیشن میں پاس کیا۔ پوری یونیورسٹی میں آپ اوّل رہے جس کے صلے میں گورنر مغربی پاکستان کی طرف سے گولڈ میڈل اور وائس چانسلر کی طرف سے سلور میڈل دیا گیا۔ آپ کے اساتذہ میں ڈاکٹر غلام مصطفےٰ خاں ایم اے جیسی معروف شخصیّت کے علاوہ درج ذیل اساتذہ کے نام سے آتے ہیں:
۱۔ حضرت مفتی اعظم مولانا محمد مظہر اللہ قدس سرہ(والد ماجد)
۲۔ مولانا محمد شریف اللہ ۱۰۔ مولانا محبوب الٰہی
۳۔ مولانا سجّاد حسین ۱۱۔ ڈاکٹر سخی احمد ہاشمی
۴۔ مولانا عبد الرحمٰن ۱۲۔ پروفیسر غلام مرتضیٰ خان
۵۔ مولانا ولایت احمد ۱۳۔ مولانا محبوب الٰہی
۶۔ مولانا اشفاق الرحمان ۱۴۔ مولانا محمد ادریس
۷۔ مولانا عبد القادر ۱۵۔ مولانا عبد السمیع
۸۔ مولانا ناصر خلیق ۱۶۔ پروفیسر مقبول احمد
۹۔ ڈاکٹر خان رشید اللہ خان ۱۷۔ پروفیسر عبد الرشید۔ وغیرہم
۱۹۵۶ء میں آپ نے دہلی میں اپنے والد ماجد کی خدمت میں حاضر ہوکر سلسلۂ عالیہ نقشبندیہ مجددیہ میں بیعت کا شرف حاصل کیا۔
علامہ مفتی محمد محمود الوری اور پیر زین الدین شاہ گیلانی کی جانب سے آپ کو خلافت حاصل ہے۔
۱۹۵۸ء میں آپ کی عملی زندگی کا آغاز گورنمنٹ کالج میر پور سے ہوا، جہاں عارضی طور پر بحیثیت لیکچرر آپ کا تقرر ہوا۔ نومبر ۱۹۵۸ء میں آپ نے (اس وقت کے) مغربی پاکستان پبلک سروش کمیشن لاہور کے اجلاس میں انٹرویو دیا جس میں کامیابی پر ۱۹۶۰ء میں آپ کی ملازمت کو مستقل کردیا گیا چنانچہ آپ نے ۱۹۶۶ء تک اسی کالج میں نمایاں طور پر تعلیمی خدمات انجام دیں۔
۱۵؍ اگست ۱۹۶۵ء کو آپ نے مغربی پاکستان پبلک سروس کمیشن لاہور کے اجلاس میں اُردو پروفیسر کی ایک اسامی کے لیے انٹرویو دیا اور کامیابی حاصل کی، چنانچہ گورنمنٹ ڈگری کالج کوئٹہ کے لیے بحیثیت پروفیسر منتخب ہوئے۔
آجکل آپ گورنمنٹ سائنس کالج سکرند ضلع نواب شاہ کے پرنسپل کی حیثیت سے کام کر رہے ہیں، جبکہ اس سے قبل آپ گورنمنٹ کالج ٹنڈو محمد خاں میں پرنسپل اور گورنمنٹ کالج مٹھی ضلع تھر پار کر اور گورنمنٹ کالج کھپرو کے پرنسپل رہ چکے ہیں۔
علاوہ ازیں آپ نظامت تعلیم کراچی کی طرف سے اردو نصاب کی کتب کے لیے ریو یور اور سندھ یونیورسٹی حیدر آباد کے زیر اہتمام بی اے اور ایم اے (اُردو) کے نصاب کی تدوین کے سلسلہ میں ممبر بورڈ آف سٹڈیز مقرر ہیں۔
سندھ یونیورسٹی حیدر آباد، پنجاب یونیورسٹی لاہور، بورڈ آف سیکنڈری ایجوکیشن حیدر آباد، کوئٹہ اور گورنر مغربی پاکستان کی جانب سے بی اے، ایم اے، ایف اے، ادیب عالم اور درجہ اول افسران کے امتحانات کے لیے ممتحن مقرر ہیں۔
حضرت پروفیسر موصوف نے میدانِ تحقیق و تحریر میں جو کام کیا ہے یا کر رہے ہیں، صفحاتِ تاریخ کا ایک زریں باب ہے۔
آپ نے طالب علمی کے دور ہی سے مضمون نگاری کا سلسلہ شروع کردیا تھا۔ چنانچہ برِ صغیر پاک و ہند کے ان گنت رسائل و جرائد اور اخبارات میں آپ نے بیسیوں تحقیقی مقالے لکھے مختلف کتب کے تراجم کیے اور ان پر مبسوط مقدمے تحریر فرمائے۔
آپ کے تحریر فرمودہ مقالات، مضامین، مقدموں ، اور تبصروں کی تعداد دو صد ہے۔
پی ایچ ڈی کے لیے آپ نے مبسوط اور مفصّل مقالہ بعنوان ’’قرآن پاک کے اُردو تراجم و تفاسیر‘‘ لکھا۔ یہ مقالہ آپ نے ۱۹۵۶ء سے ۱۹۶۵ء تک تقریباً آٹھ سال کے طویل عرصہ میں پایۂ تکمیل تک پہنچایا اور یہ ٹائپ شدہ فل اسکیب سائز کے ایک ہزار صفحات پر پھیلا ہوا ہے اس مقالے کے لیے آپ نے پاک و ہند اور بیرونی ممالک کے تقریباً اکسٹھ (۶۱) کُتب خانوں سے استفادہ کیا اور تقریباً چھ سو کتابیں مطالعہ فرمائیں۔ مقالات کے علاوہ آپ نے جو کتابیں تصنیف فرمائیں، مرتب کیں یا تراجم کیے، ان میں چند یہ ہیں:
۱۔ حیدر آباد کی معاشی تاریخ (ترجمہ) (تصنیف محمد حسین ترک)
۲۔ شاہ محمد غوث گوالیاری (سوانح)
۳۔ تمدّنِ ہند پر اسلامی اثرات (ترجمہ) (تالیف ڈاکٹر تارا چند)
۴۔ دائمی تقویم (ترتیب) (تصنیف مولوی منظور احمد)
۵۔ مظہر الاخلاق (ترتیب) (تصنیف حضرت شاہ محمد مظہر اللہ)
۶۔ ارکانِ دین (ترتیب) (تصنیف حضرت شاہ محمد مظہر اللہ)
۷۔ مکاتیبِ مظہری (حضرت مفتی محمد مظہر اللہ کے دو ہزار مکتوب گرامی)
۸۔ فتاویٰ مظہری جلد اوّل (ترتیب) (حضرت مفتی محمد مظہر اللہ کے تحقیقی فتوے)
۹۔ مظہر العقائد (ترتیب و تحشیہ) (تصنیف حضرت مفتی محمد مظہر اللہ)
۱۰۔ شیخ احمد سرہندی مجدد الف ثانی (سوانح اور علمی و اصلاحی کاموں کا تفصیلی و تحقیقی جائزہ)
۱۱۔ مکاشفاۃ الاسرار (میر سید علی غمگین دہلوی کے دیوان رباعیات کی ترتیب)
۱۲۔ خطوط مشاہیر (پروفیسر موصوف کے نام مشاہیر فضلاء کے علمی و ادبی خطوط)
۱۳۔ دیرونا کے دو شریف زادے (ترجمہ) (تصنیف ولیم شیکسپئر) [۱]
[۱۔ محمد مسعود احمد، پروفیسر ’’تذکرہ مظہر مسعود‘‘ ملحضاً۔]
ان کے علاوہ درج ذیل تصانیف آپ کی شاہکار ہیں:
۱۴۔ فاضل بریلوی اور ترکِ موالات (مرکزی مجلسِ رضا لاہور کی طرف سے اس کے کئی ایڈیشن چھپ چکے ہیں)
۱۵۔ فاضلِ بریلوی علماء حجاز کی نظر میں (اس کے بھی متعدد ایڈیشن چھپ چکے ہیں)
۱۶۔ ’’حیاتِ فاضل بریلوی‘‘ (جامعہ نظامیہ رضویہ لاہور کی بزمِ رضا نے شائع کی)
۱۷۔ ’’محبّت کی نشانی‘‘ (داڑھی کی اہمیّت و فضیلت (زیر طبع)
۱۸۔ حضرت صدر الافاضل مولانا سیّد محمد نعیم الدین مراد آبادی قدس سرہ کی تصنیف لطیف ’’اطیب البیان‘‘ کا مبسوط مقدمہ کا ترجمہ بنگلہ زبان میں عنقریب شائع ہونے والا ہے۔
۱۹۔ ’’تحریک آزادیٔ ہند اور السّوادِ الاعظیم‘‘ (تحریکِ آزادیٔ ہند میں علماء اہل سنّت، بالخصوص ما ہنامہ ’’السّواد الاعظم‘‘ مراد آباد کی خدمت کا تفصیلی جائزہ مطبوعہ رضا پبلی کیشنز لاہور۔
۲۰۔ ’’موجِ خیال‘‘ (مطبوعہ مدینہ پبلشنگ کراچی) زندگی کے ہر ادبی و روحانی تاثرات جو ماہنامہ ’’ضیائے حرم‘‘ بھیرہ کی کئی قسطوں میں شائع ہوئے۔
۲۱۔ ’’شاعرِ محبّت‘‘ (مطبوعہ مکتبہ رضویہ گجرات) حضرت شاہ عبد اللطیف بھٹائی کی حیات اور ان کے افکار۔
۲۲۔ ’’ایشیا کا مظلوم عبقری‘‘ (امام احمد رضا بریلوی قدس سرہ) (انگریزی) مطبوعہ مرکزی مجلسِ رضا لاہور)
۲۳۔ امام احمد رضا خاں بریلوی قدس سرہ کی شخصیت پر مقالہ، ’’دائرۃ المعارف‘‘ (انسائیکلو پیڈیا) مطبوعہ پنجاب یونیورسٹی لاہور ج؍ ۱۰۔
۲۴۔ مقدمہ رسالہ در علم لوگار ثم محشیّٰ امام احمد رضا خاں بریلوی قدس سرہ، مطبوعات ادارۂ تحقیقات امام احمد رضا، کراچی۔
۲۵۔ مقدمہ ’’دوام العیش فی الائمۃ من قریش‘‘ از امام احمد رضا خاں بریلوی قدس سرہ العزیز۔
۲۶۔ ’’مولانا عبد القدیر بدایونی‘‘ مطبوعہ مکتبہ قادریہ لوہاری دروازہ، لاہور۔
۲۷۔ تذکرۂ مظہر مسعود مدینہ پبلشنگ کراچی ۱۹۶۹ء
۲۸۔ حیات مظہری مطبوعہ کراچی ۱۹۷۴ء
۲۹۔ عاشق رسول مطبوعہ لاہور ۱۹۷۶ء
۳۰۔ کلام الامام غیر مطبوعہ
۳۱۔ حیات امام احمد رضا بریلوی غیر مطبوعہ
۳۲۔ حضرت مجدد اور اقبال غیر مطبوعہ
۳۳۔ حیات امام احمد رضا (مسبوط) غیر مطبوعہ
۳۴۔ مرقع مظہری غیر مطبوعہ
۳۵۔ قانونین خیال غیر مطبوعہ
۳۶۔ مجموعہ تقاریر غیر مطبوعہ
۳۷۔ اکرام امام احمد رضا غیر مطبوعہ
۳۸۔ مواعظ مظہری مطبوعہ کراچی ۱۹۶۹ء
۳۹۔ سراج منیر مطبوعہ کراچی ۱۹۷۹ء
۴۰۔ فتاویٰ مسعودی غیر مطبوعہ
آپ نے درج ذیل ملکی و غیر ملکی کانفرنسوں میں شرکت فرمائی اور مقالات پڑھے۔ آل پاکستان اسلامک سٹڈیز کانفرنس منعقدہ سندھ یونیورسٹی حیدر آباد (۱۹۶۳ء) فرسٹ نیشنل کانفرنس فوردی پروموشن آف عربک منعقدہ کراچی یونیورسٹی کراچی (۱۹۷۵ء) سیکنڈ ورلڈ کانفرنس، ورلڈ اسلامک مشن منعقدہ بریڈ فورڈ انگلینڈ (۱۹۷۸ء) انٹرنیشنل سیرت کانفرنس وزارت امور مذہبی حکومت پاکستان اسلام آباد۔ (۱۹۷۸ء)۔
۱۹۶۵ء کی پاک بھارت جنگ میں آپ کنٹرول روم میر پور خاص کے انچارج کی حیثیت سے متعلقہ امور سر انجام دیتے رہے۔
۱۹۶۵ء ہی میں ایجنسل لیکچررز ایسوسی ایشن حیدر آباد کے صدر مقرر ہوئے۔
۱۹۷۱ء میں آپ نے لوکل کونسل الیکشن (سندھ) سکرند میں ریٹرننگ افسر کی حیثیت سے کام کیا۔
علاوہ ازیں ۱۹۵۶ء میں مظہریہ مجلس عید میلاد النبی صلی اللہ علیہ وسلم لاہور کے نام سے ایک مجلس قائم فرمائی، جس کی جگہ آج کل ’’بزم اربابِ طریقت‘‘ کام کر رہی ہے، جو ۱۹۶۱ء میں آپ کے والد ماجد نے قائم فرمائی تھی۔
آپ کی اولاد امجاد میں صاحبزادہ محمد مسرور احمد اور تین صاحبزادیاں کوکب جہاں، ثروت جہاں اور سعدیہ بیگم کے اسماء شامل ہیں۔
پروفیسر محمد مسعود احمد مدظلہ باوجود یکہ ایک کالج کے پرنسپل ہیں اور انہیں شب و روز کالج کے ماحول سے سابقہ پڑتا ہے، لیکن اس کے باوجود آپ کی وضع قطع، گفتار اور کردار کو دیکھ کر کسی پیر طریقت کا گمان ہوتا ہے۔ آپ اپنی صورت و سیرت کے لحاظ سے بجا طور پر یاد گارِ اسلاف ہیں۔
[۱۔ مکتوب حضرت پروفیسر مسعود احمد صاحب بنام مرتب۔]
حضرت پروفیسر صاحب نے اپنی خدا داد قلمی صلاحیتوں کو بروئے کار لانے میں کبھی بخل سے کام نہیں لیا، بلکہ ان کا قلم، اسلامی تعلیمات اور مفکرین اسلام کی خدمات کو اُجاگر کرنے میں مصروف ہے۔
آپ کا امّتِ مُسلمہ بالخصوص اہلِ سنّت و جماعت پر ایک عظیم احسان یہ ہے کہ آپ دورِ حاضر کے عظیم مصلح و مجدّد اور علم و حکمت کے بحرِ بے کنار اعلیٰ حضرت امام احمد رضا خاں فاضل بریلوی کی شخصیت کو بغض و عناد کی دبیز تہوں سے منصّۂ شہود پر لائے اور جدید انداز میں آپ کے علمی و تجدیدی کار ناموں کو پیش کیا جس سے موجودہ تعلیم یافتہ طبقہ بے حد متاثر ہوا اور مخالفین کا پھیلایا ہوا بے بنیاد اور جھوٹا پرو پیگنڈہ اپنی موت آپ مرگیا۔
اس کے ساتھ ساتھ پروفیسر محمد مسعود احمد مدظلہ نے اہلِ سُنّت و جماعت کے قلمکاروں کو نئے اندازِنگارش سے روشناس کرایا۔
(تعارف علماءِ اہلسنت)