حضرت فاضل نبیل مولانا ابُو الصّالح محمد فیض احمد اویسی
حضرت فاضل نبیل مولانا ابُو الصّالح محمد فیض احمد اویسی، بہاول پور علیہ الرحمۃ
صاحبِ تصانیفِ کثیرہ حضرت مولانا ابوالصالح محمد فیض احمد اویسی بن مولانا نور احمد قدس سرہ ۱۳۵۱ھ/۱۹۲۲ء میں حامد آباد ضلع رحیم یار خان (بہاول پور ڈویژن) کے مقام پر پیدا ہوئے۔ آپ کا تعلق لاڑ خاندان سے ہے جسے (بقول آپ کے) بعض کے نزدیک حضرت عباس رضی اللہ عنہ، کی اولاد سمجھا جاتا ہے۔
آپ نے ابتدائی تربیت اپنے والد مکرم سے پائی اورپھر حفظِ قرآن پاک کے سلسلے میں حضرت حافظ سراج احمد، حافظ جان محمد اور حافظ غلام یٰسین قدست اسرارھم سے شرفِ تلمذ حاصل کیا۔ فارسی حکیم مولانا اللہ بخش سے پڑھی اور علوم عربیہ کی کتب متداولہ حضرت مولانا الحاج خورشید احمد، مولانا عبدالکریم اور سراج الفقہاء مولانا سراج احمد رحمہ اللہ سے پڑھنے کے بعد جامعہ رضویہ مظہر اسلام فیصل آباد میں حضرت مولانا محمد سردار احمد رحمہ اللہ سے درسِ حدیث لیا۔ ۱۳۷۲ھ/۱۹۵۲ء میں سندِ فراغت حاصل کی۔
حصول علم سے فراغت کے بعد آپ نے اپنے آبائی گاؤں حامد آباد میں ایک دینی ادارہ قائم فرمایا، جہاں تقریباً پندرہ سال تک علم کی شمع روشن کرنے کے بعد ۱۳۸۷ھ/۱۹۶۷ء میں بہاول پور منتقل ہوگئے۔
بہاول پور میں جامعہ اویسیہ رضویہ کے نام سے ایک ادارہ قائم فرمایا جہاں تا حال اشاعتِ دین کا مقدس پروگرام جاری ہے۔ علاوہ ازیں آپ ہر سال رمضان المبارک میں اطراف و اکناف سے آنے والے طلباء کو قرآنِ پاک کی تفسیر بھی پڑہاتے ہیں۔
آپ جہاں ایک فاضل مدرس ہیں، وہاں تحریر میں بھی یدِ طولیٰ رکھتے ہیں: چنانچہ سات سو کتب و رسائل کی تصنیف و ترتیب کا سہرا آپ کے سر ہے جن میں سے چند کتب کے نام دَرج ذیل ہیں:
۱۔ تفسیر فیوض الرحمٰن
۲۔ نعم الحامی شرح لشرح جامی
۳۔ صدائے نوی شرح مثنوی معنوی
۴۔ شرح لشرح مائۃ عامل
۵۔ شرح ایسا فوجی
اس کے علاوہ آپ ہفتہ وار ’’الہام‘‘ بہاول پور کے مشیرِ ادارہ بھی ہیں۔
آپ کی بیعت حضرت الحاج خواجہ محمد الدین رحمہ اللہ (سجادہ نشین دربارِ عالیہ حضرت خواجہ محکم الدین سیرانی رحمہ اللہ)سے ہے۔ اور سلسلہ قادریہ میں حضرت مفتی اعظم ہند مولانا مصطفےٰ رضا خاں دامت برکاتہم شہزادۂ اعلیٰ حضرت بریلوی رحمہ اللہ کی طرف سے سندِ مجاز بھی حاصل ہے۔
تصنیف و تالیف اور تدریس کے علاوہ آپ ملکی سیاست سے بھی گہرا شغف رکھتے ہیں:
چنانچہ آپ مملکتِ خدا داد پاکستان میں نظامِ مصطفےٰ صلی اللہ علیہ وسلم کے نفاذ و مقام مصطفےٰ صلی اللہ علیہ وسلم کے تحفظ کی خاطر قائدِ اہل سنّت علامہ شاہ احمد نورانی صدیقی کی قیادت میں مصروفِ عمل جمعیت سے منسلک ہیں۔
آپ کے کثیر التعدادتلامذہ میں سے چند ایک کے اسماء درج کیے جاتے ہیں:
۱۔ مولانا حافظ عبدالمجید، لیاقت پور،
۲۔ مولانا مختار احمد، خان پور
۳۔ مولانا غلام محمد، کوئٹہ
۴۔ مولانا عزیز اللہ، لاڑکانہ
۵۔ مولانا حافظ عبدالستار
آپ کے چار صاحبزادے بنام حافظ محمد صالح، حافظ محمد عطاء الرسول، حافظ محمد فیاض اور حافظ محمد ریاض ہیں، جبکہ ایک صاحبزادی کنیز فاطمہ نامی [۱] ہیں۔
[۱۔ مکتوب حضرت مولانا ابوالصالح محمد فیض احمد اویسی۔]
(تعارف علماءِ اہلسنت)