حضرت سید شاہ تراب الحق قادری کے خاندانی حالات
حضرت سید شاہ تُراب الحق قادری کے خاندانی حالات
ابو تراب مولانا محمدرئیس قادری
پیرِ طریقت حضرت علامہ سیّد شاہ تراب الحق قادری عَلَیْہِ الرَّحْمَۃ، حیدر آباد دکن ضلع نانڈھیر موضع کلمبرجاگیر صوبہ اورنگ زیب جس کا قدیمی نام احمد آباد تھا، کے ایک نہایت معزز سادات گھرانے میں پیدا ہوئے۔ آپ کے جدِّ امجد ساتویں ہجری میں بغداد شریف سے ہجرت کر کے حیدر آباد دکن تشریف لائے۔
خاندانی روایات کے مطابق اُن کا نام سیّد شاہ میراں قادری تھا اور وہ سیّد السادات کے لقب سے ملقب تھے۔ اُن کے ساتھ اُن کے سگے بھانجے بھی تھے جن کا نام حضرت سیّد شاہ شیخ علی عَلَیْہِ الرَّحْمَۃ تھا جو ’’سانگڑے سلطان مشکل آسان‘‘ کے نام سے یاد کیے جاتے ہیں وہ حضرت سیّدنا سیّد احمد کبیر رفاعی عَلَیْہِ الرَّحْمَۃ کی اولاد سے تھے۔اُن کے متعلق مشہور تھا کہ کوئی آدمی اگر مصیبت میں مبتلا ہو اور ’’یا سانگڑے سلطان مشکل آسان‘‘ کہے تو اس کی دستگیری ہوتی تھی۔ ان کا مزار قندھار اور شاہ صاحب کے بزرگوں کے مزار موضع کلمبر میں ہیں۔ چوں کہ انھوں نے خواب میں کسی کو مزار شریف کو پختہ کرنےاور گنبد بنانے سے منع کیا تھا اس وجہ سے ان کا مزار ایک چبوترے پر ہے اور اس سے متصل ایک مسجد بھی ہے۔ یہ مزار درگاہ سیّد السادات کے نام سے مشہور ہے۔
(’’تاریخ قندھار دکن‘‘، مولفہ منشی محمد امیر حمزہ، مطبوعہ امانت پریس حیدرآباد دکن)
ان دونوں بزرگوں کو اس زمانے کے بادشاہوں نے کچھ جائیدادیں بطورِ ہدیہ دیں جو نسل در نسل منتقل ہوتی چلی آئیں۔ ساتویں صدی ہجری سے گیارھویں صدی تک کا ریکارڈ اس زمانے کی عدالتوں اور شاہی خاندانوں کے اثاثوں میں تھا، سیّد السادات قُدِّسَ سِرُّہٗ کے بعد کی اولاد میں جب جائیداد منتقل ہوئی، اِس کی تفصیل کچھ یوں ہے:
حضرت شاہ صاحب کےجدِّ امجد حضرت قدوۃ الواصلین زبدۃ السالکین حضرت مخدوم (سیّد شاہ میراں قادری) قُدِّسَ سِرُّہٗ، یہ وہ القاب ہیں جو اُس زمانے کی سند میں مذکور ہیں، اُن کی کئی پشتوں کے بعد حضرت حافظ سیّد شاہ قاسم قادری، اُن کے صاحبزادے سیّد شاہ غلام محی الدین پھر ان کے صاحبزادے سیّد شاہ عبداللہ قادری، اُن کے صاحبزادے سیّد شاہ میراں قادری، اُن کے صاحبزادے سیّد شاہ محی الدین قادری، ان کے دو صاحبزادے تھے جن میں ایک شاہ صاحب کے والدِ ماجد سیّد شاہ حسین قادری،اور ایک ان کے تایا سیّد شاہ امیر اللہ قادری۔ سیّد شاہ امیراللہ قادری حیدر آباد دکن میں 1948ء میں، جب بھارت نے حیدرآباد دکن پر پولیس ایکشن کے ذریعے حملہ کیا، شہید کر دیے گئے، جب کہ شاہ صاحب کے والد، والدہ اورسب بھائی بہن اس میں اللہ تعالیٰ کے فضل و کرم سے سلامت رہے۔
شاہ صاحب کی والدۂ ماجدہ فاروقی ہیں، حیدر آباد دکن کے مدیر المہام امورِ مذہبی، مصنّفِ کتبِ کثیرہ، مصنّفِ مقاصد الاسلام (گیارہ جلدیں)، اَنوارِ احمدی، کتاب العقل وغیرہ حضرت علامہ مولانا اَنواراللہ خاں فاروقی رحمۃ اللہ علیہ سے شاہ صاحب کا ننھیال ہے۔
شاہ صاحب قبلہ کے خاندانی حوالے سے جو ریکارڈ اس قلیل وقت میں میسر آیا اس کے مطابق کچھ کی تفصیل مندرجۂ ذیل ہے:
نام: سیّد شاہ تراب الحق قادری
والد: سیّد شاہ حسین قادری
والدہ: اکبرالنساء بیگم
ولادت: 27؍رمضان المبارک 1363ھ/15؍ستمبر1944ء
پاکستان ہجرت اور لیاقت بستی میں قیام: 1951ء
کورنگی منتقلی: 1959ء
- P. T.میں ملازمت: 1962ء
حضور مفتیِ اعظم سے بیعت بذریعۂ خط: 1962ء
والدِ ماجد کا انتقال: 1964ء (تدفین کورنگی نمبر1کے قبرستان میں ہوئی )
درسِ نظامی کی تکمیل: غالباً1967ء
شادی خانہ آبادی: 20؍ ذیقعدہ1385ھ/ 13؍مارچ 1966ء
صاحبزادہ سیّد شاہ سراج الحق کی
ولادت: 1966ء
صاحبزادی سیّدہ مسرت فاطمہ کی
ولادت: 1967ء (اِن کا بچپن میں انتقال ہو گیا)
صاحبزادی سیّدہ نصرت فاطمہ کی
ولادت: 26؍ جولائی1968ء
بریلی شریف حاضری، مرشِد کی
خدمت میں 13روز: 1968ء
صاحبزادہ سیّد شاہ عبدالحق کی
ولادت: 16؍اکتوبر1970ء
صاحبزادی سیّدہ نگہت فاطمہ کی
ولادت: 5؍دسمبر1971ء
بھائی سیّد شاہ شمیم اللہ قادری کی
شہادت: 1974ء (تدفین کورنگی نمبر6کے قبرستان میں ہوئی )
صاحبزادی سیّدہ رفعت فاطمہ کی ولادت: 6؍دسمبر1975ء
صاحبزادہ سیّد شاہ فرید الحق کی ولادت: یکم دسمبر1976ء
صاحبزادی سیّدہ طلعت فاطمہ کی ولادت: 6؍جون1977ء
صاحبزادی سیّدہ عفت فاطمہ کی ولادت: 6جولائی1979ء
پہلا تبلیغی دورہ: نیروبی، کینیا
قاری صاحب سے خلافت و اعلانِ جانشینی: 22؍ اپریل1982ء
قاری صاحب علیہ الرحمۃ کا وصال: 23؍مارچ1983ء (تدفین مصلح الدین گارڈن میں ہوئی )
قومی اسمبلی کے رکن منتخب ہوئے: 1985ء
جماعتِ اہلِ سنّت کراچی کے
امیر منتخب ہوئے: 1992ء
صاحبزادہ سیّد شاہ عبدالحق قادری کے
درسِ نظامی کی تکمیل: 1996ء
والدۂ ماجدہ کا انتقال: 14؍ مارچ 1997ء(تدفین عیسیٰ نگری کے قبرستان میں ہوئی)
بہن سیّدہ شفیعہ بیگم کا انتقال: 14؍ دسمبر1998ء(تدفین قصبہ کالونی کے قبرستان میں ہوئی)
مسجدِ حبیب کا افتتاح: 15؍ جولائی1999ء
بھائی سیّد شاہ اَنواراللہ قادری کا انتقال: 29؍محرم1999ء(تدفین یسین آباد کے قبرستان میں ہوئی)
صاحبزادی سیّدہ عفت فاطمہ کے
درسِ نظامی کی تکمیل: 13؍ اگست2000ء
بھائی سیّد شاہ قاسم قادری کا انتقال: 2002ء(تدفین کورنگی نمبر 6کے قبرستان میں ہوئی)
مدارسِ اہلِ سنّت کا قیام: 2006ء
سانحۂ نشتر پارک: 11؍ اپریل 2006ء
بھائی سیّد شاہ سیف اللہ کا انتقال: 2007ء(تدفین کورنگی نمبر6کے قبرستان میں ہوئی)
بیماری کا آغاز(پہلا ڈائلیسسز): 17؍ مئی2012ء
اہلیہ کا انتقال: 17؍ ذیقعدہ1436ھ/ 2؍ ستمبر2015ء
وصال: 4؍محرم الحرام1438ھ/ 6؍ اکتوبر2016ء
مزار: مصلح الدین گارڈن، کراچی۔
