پیرِ طریقت، رہبرِ شریعت حضرت علامہ قاری مصلح الدین رضوی صدیقی

پیرِ طریقت، رہبرِ شریعت حضرت علامہ قاری مصلح الدین رضوی صدیقی رحمۃ اللہ تعالیٰ علیہ

ولادت

حضرت مولانا قاری محمد مصلح الدین رضوی صدیقی علیہ الرحمہ ۱۱؍ ربیع الاول ۱۳۳۶ھ؍۱۹۱۷ء بروز پیر بوقت صبح صادق بمقام قندہا شریف ضلع قندہار شریف ضلع ناندیڑ ریاست حیدر آباد میں پیدا ہوئے حضرت قاری مصلح الدین رضوی کے والد ماجد کا نام مولانا غلام جیلانی ہے۔

خاندانی حالات

غلام جیلانی نے اپنے چچا غلام حامد عرف مدنیمیاں سے فارسی کی تعلیم حاصل کی فارسی میں گلستاں بوستاں وغیرہ یہ ساری کتابیں انہی سے پڑھیں۔ شاہان سلف کی دی ہوئی زمینداری قاری مصلح الدین کے آباد واجداد سے چلی آرہی ہے۔ قندہار شریف کے قلعہ کی مسجد میں مولان غلام جیلانی خدمت خطابت وامامت انجام دیتے رہے اور یہ سلسلہ تقریباً پچپن سال تک چلتا رہا۔ مولانا غلام جیلانی ہجرت کر کے پاکستان چلے گئے اور یہیں ۲۵؍نومبر ۱۹۵۵ء میں اچانک انتقال ہوگیا۔

تعلیم وتربیت

حضرت قاری مصلح الدین نے نو سال کی عمر میں ناظرہ قرآن کریم ختم کیا۔ ۱۳۵۰ھ؍۱۹۳۱ء میں چودہ سال کی عمر میں حفظ قرآن اور ابتدائی تعلیم کا آغاز کیا۔ قاری مصلح الدین نے اپنے والد ماجد سے قرآن حفظ کیا۔ اور حافظ ملت مولانا عبدالعزیز رضوی مبارکپوری علیہ الرحمہ نے تکمیل حفظ قرآن کے موقع پر دستار بندی کی۔ ان دنوں حافظ ملت مولانا عبدالعزیز رضوی علیہ الرحمۃ دارالعلوم عثمانیہ معینیہ اجمیر مقدس میں زیر تعلیم تھے۔ قاری مصلح الدین نے انگریزی تعلیم بھی حاصل کی تھی۔ مزید دینی تعلیم حاصل کرنے کی غرض سے ۱۳۵۴ھ؍ ۱۹۳۵ء دارالعلوم اشرفیہ مصباح العلوم مبارک پور ضلع اعطم گڑح میں داخلہ لیا اور وہاں آٹھ سال تک زیر تعلیم رہے۔

۱۹۴۳ء میں حضرت حافظ ملت علیہ الرحمہ مبارکپور سے جامعہ عربیہ ناگپور تشریف لے گئے تو قاری مصلح الدین بھی جامعہ عربیہ ناگپور میں منتقل ہوگئے۔ اس جامعہ عربیہ میں فراغت حاصل کی اور وہیں محدث اعظم مولاناسید محمد رضوی اشرفی کچھوچھوی علیہ الرحمہ کی موجودگی میں دستار بندی ہوئی۔

اساتذۂ کرام

۱۔ صدر الشریعۃ حضرت مولانا محمد امجد علی رضوی اعظمی علیہ الرحمہ

۲۔ حجۃ الاسلام حضرت مولانا محمد حامد رضا خاں بریلوی علیہ الرحمہ

۳۔ محدث اعطم ہند حضرت مولانا سید محمد رضوی اشرفی کچھوچھوی علیہ الرحمہ

۴۔ حافظ ملت حضرت مولانا عبدالعزیز رضوی مراد آ﷜بادی

۵۔ حضرت مولانا محمد سلیمان بھاگلپوری رحمۃ اللہ علیہ

۶۔ حضرت مولانا ثناء اللہ رضوی اعظمی رحمۃ اللہ علیہ

پاکستان میں آمد اور امامت وخطابت

تقسیم ملک قیام پاکستان کے بعد قاری مصلح الدین علیہ الرحمہ ہجرت کر کے ۱۹۴۹ء میں کراچی تشریف لائے۔ ابتداءً کچھ عرصہ دارالعلوم امجدیہ آرام باغ گاڑی کھاتہ کراچی میں مقیم رہے ۱۹۵۰ء میں اخوند مسجد کھارادر کراچی میں امام وخطیب مقرر ہوئے۔ جہاں انیس سال خدمات سر انجام دیں۔ اسی دوران تقریباً ڈیڑھ سال قاری مصلح الدین مرکزی مسجد واہ کینٹ ضلع رالپنڈی میں فرائض امامت وخطابت انجام دیے۔ ۱۹۴۹ء میں قاری مصلح الدین سر انجام دیتے رہے، اس مسجد میں مشغول رہے۔

حضرت قاری مصلح الدین علیہ الرحمۃ امامت وخطابت کے ساتھ ساتھ دارالعلوم ا مجدیہ کراچی میں تقریباً پندرہ برس تک بطور معلم و مدرس پوری لگن کے ساتھ تعلیم وتدریس کے فرائض انجام دیئے۔

عقد مسنون

قاری مصلح الدین علیہ الرحمہ کی پہلی شادی ۱۳۶۰ھ؍۱۹۴۱ء میں ۲۴سال کی عمر میں ہوئی یہ شادی فاروقی خاندان کی لڑکی سے ہوئی۔ جن سے دو صاحبزادیاں ہیں۔ دوسر شادی تیس ۳۰ برس ک ی عمر میں ہوئی۔ ۲۰؍ذی الحجہ ۱۵؍نومبر ۱۳۶۵ھ؍۱۹۴۶ء کو جبلپور (ایم۔ پی) سید صوفی محمد حسین عباسی کی صاحبزادی سے ہوئی جن سے ایک صاحبزادی اور تین صاحبزادے تولد ہوئے۔ صاحبزادگان کے اسماء یہ ہیں:

۱۔محمد صلاح الدین صدیقی، متولد ۲۷؍ربیع الاول۷؍دسمبر(۱۳۷۱ھ؍ ۱۹۵۱ء)

۲۔ مصباح الدین صدیقی، متولد ۴؍ذیقعدہ ؍۳۰؍مارچ (۱۳۸۲ھ؍۱۹۶۲ء)

۳۔ محمد معین الدین صدیقی، متولد ۲؍صفر المظفر؍ ۱۸؍مارچ (۱۳۹۲ھ؍ ۱۹۷۲ء)

زیارت حرمین شریفین

حضرت قاری مصلح الدین علیہ الرحمہ نے ۳۸سال کی عمر شریف میں ۱۳۷۴ھ؍ ۱۹۵۴ء کو پہلا حج کیا اس سفر میں عبدالشکور مرحوم بھی ہمراہ تھے۔ اس حج کے دوران جب قاری مصلح الدین مدینہ طیبہ پہنچے تو قطب مدینہ حضرت مولانا ضیاء الدین احمد مدنی رضوی علیہ الرحمہ سے پہلی ملاقات کی۔ مولانا ضیاء الدین احمد رضوی مدنی علیہ الرحمۃ قاری مصلح الدین سے مل کر بے حد مسرور ہوئے۔ اور قاری مصلح الدین کو ساتھ لے کر سرکار دو عالم صلی اللہ تعالیٰ علیہ وسلم کے روضۂ اقدس واطہر پر حاضری دی۔ بارگاہ رسالت صلی اللہ تعالیٰ علیہ وسلم میں ہدیہ صلوٰۃ وسلام عرض کرنے کے بعد سید نا امیر المومنین حضرت صدیق اکبر رضی اللہ تعالیٰ عنہٗ حضرت سیدنا امیر المومنین فاروق اعطم رضی اللہ تعالیی عنہٗ کے حضور نذرانہ عقیدت وسلامہ عرض کیا۔ قاری مصلح الدین اپنی حیات دنیوی میں بارہ مرتبہ زیارت حرمین سےمشرف ہوئے۔ اور ہر مرتبہ حج وزیارت کو روانہ ہونے سے قبل حضرت امام الاولیاء سید علی ہجویری داتا گنج بخش علیہ الرحمہ کے مزار اقدس پر ضرور حاضر ہوتے تھے، اور فرماتے تھے کہ میرے حج کے لیے ویزا یہیں سے بنتا ہے۔

بغداد شریف

حضرت قاری مصلح الدین علیہ الرحمۃ نے ۱۹۷۰ء ؍۱۳۹۰ھ میں ۵۴ سال کی عمر شریف م یں سفر حج وزیارت کے دوران سرکار بغداد حضرت غوث الاعظم پاک رضی اللہ تعالیٰ عنہ کے مزار انوار پر حاضری دی۔ اس سفر میں حاجی انور توکلی، مولانا عبدالعزیز عرفی بھی ہمراہ تھے۔

یادگاریں

حضرت قاری مصلح الدین علیہ الرحمۃ نے واہ کینٹ کی امامت وخطابت کے دوران کچھ فتاوے تحریر فرمائے۔ وہ فتاوے بعض رسالوں میں چھپے بھی۔ اور ترمذی شریف کا ترجمہ بھی شروع فرمایا تھا۔ تقریباً ڈیڑھ سو صفحات کا ترجمہ ہوگیا۔ مگر علالت کی وجہ سے یہ ترجمہ نا مکمل رہ گیا۔

بزم رضا عرس کمیٹی کا قیام ۲۸؍زی الحجہ ۱۳۹۲ھ؍۱۹۷۲ء میں قاری مصلح الدین کی کوشش سے عمل میں ایا اور ۸؍رجب المرجب ؍ ۲۳؍مئی ۱۹۸۰ء؍ ۱۴۰۰ھ میں مدرسہ انوار القران کا سنگ بنیاد رکھا۔ ۱۴۰۱ھ؍۱۹۸۱ء میں ضیاء ٹیب لائبریری کا قیام عمل میں آیا اور دارالکتب حنفیہ مصلح الدین گارڈن کراچی بھی قاری مصلح الدین کی یادگاروں میں ہے۔

ہندوستان کا سفر

حضرت قاری مصلح الدین نےپاکستا جانے کے بعد ہندوستان کا تین مرتبہ سفر کیا۔ پہلا سفر چالیس سال کی عمر میں ۱۳۷۶ھ؍ ۱۹۵۶ء کو کیا۔ دوسرا سفر ۶۴سال کی عمر میں ۱۴۰۰ھ؍۱۹۸۰ء کو کیا۔ تیسری مرتبہ صفر المظفر ۱۹۸۱ء؍ ۱۴۰۲ھ میں حضور مفتی اعظم قدس سرہ کے چہلم میں شرکت کے لیے ہندوستان تشریف لائے۔

بیعت وخلافت

مولانا قاری مصلح الدین علیہ الرحمہ زمانۂ تعلیم دارالعلوم اشرفیہ مبارکپور میں بعمر بائیس سال ۱۱؍شعبان المعظم ۱۳۵۸ھ؍۱۹۴۰ء کو صدر الشریعہ حضرت مولانا محمد امجد علی رضوی اعظمی علیہ الرحمۃ کے ہاتھ پر شرف بیعت حاصل کیا۔ فراغت کے بعد ناگپور میں جب قاری مصلح الدین خطیب مقرر ہوئے تو جامعہ رضویہ کے سالانہ اجلاس میں حضرت صدر الشریعہ علیہ تشریف لائے۔ اجلاس سے فارغ ہوکر چھلواڑہ ایک مقام ہے۔ وہاں تشریف لے گئے تو قاری مصلح الدین کو بھی ہمراہ لے گئے وہاں پہنچنے کے بعد حاجی عبدالقادر کے مکان پر ایک نعت خوانی کی مجلس ہوئی۔ اس مجلس میں مولانا اشرف علی قادری اور مولوی نثار احمد مبارکپوری بھی تھے۔ اور وہاں کے مقامی حضرات بھی تھے۔ قاری مصلح نے حضرت صدر الشریعہ علیہ الرحمہ سے درخواست کی کہ میں حضرت علامہ جامی قدس سرہٗ کے الفاظ میں حضور کی وساطت سے بارگاہ رسالت میں کچھ عرض کرنا چاہتا ہوں۔ صدر الشریعہ نے فرمایا ضرور تو قاری مصلح الدین نے ایک نعت شریف پڑھی جسکا ایک شعر یہ ہے:۔

یا محمد بمنِ بے سروساماں مددِ
قبلۂ دین مدد کعبۂ ایماں مدد

حضرت قاری مصلح الدین نے جب یہ نعت شریف پڑھی تو سب پر رقت طاری ہوگئی۔ حضرت صدر الشریعہ بھی زارو قطار ہے تھے۔ ابھی پوری نعت نہ ہو پائی تھی کہ حضرت صدر الشریعہ علیہ الرحمۃ اُٹھے اور فرمانے لگے بہت عرصے سے میں چاہتا تھا کہ تم کو خلافت دوں آج میں تم کو خلافت دیتا ہوں۔ یہ واقعہ ۱۳۶۵ھ؍ ۱۹۴۵ء کا ہے۔

قاری مصلح الدین علیہ الرحمہ کو ۶۱ سال کی عمر میں ۲۰؍رجب المرجب ۱۳۹۷ھ؍۱۹۷۷ء کو قطب مدینہ حضرت مولانا ضیاء الدین احمد مدنی رضوی علیہ الرحمۃ نے خلافت سے نوازا۔

۱۳۷۶ھ میں مولانا مصلح الدین بریلی شریف تشریف لائے۔ تو حضور مفتی اعظم قدس سرہٗ سے خلافت کی تمنا لے کر حاضر ہوئے۔ مگر وہ وقت حضرت حجۃ الاسلام مولانا حامد رضا بریلوی علیہ الرحمہ کے عرس شریف کا تھا۔ حضرت مفتی اعطم قدس سرہٗ کی مصروفیت کے سبب دیرینہ خواہش کی تکمیل نہ ہوسکی۔ پھر قاری مصلح الدین نے ایک خط بنام حضور مفتی اعطم قدس سرہٗ لکھا، جس میں اپنی دیرینہ خواہش کا اظہار کیا۔

اس دوران حضور مفتئ اعظم قدس سرہٗ کا قیام جبلپور میں تھا۔ جب قاری مصلح الدین کا خط پہنچا تو حضور مفتی اعظم نے برہان الملت حضرت مولانا برہان الحق رضوی جبلپوری رحمۃ اللہ علیہ سے خط لکھواکر مبارکپور بنام قاری مصلح الدین روانہ ک یا۔ اور اس میں لکھا تھا کہ میں آپ سے ملنے مبارکپور ہی آرہا ہوں۔ آپ میرا وہیں انتظار کریں۔ قاری مصلح الدین نےمناسب نہ سمجھا کہ حضور مفتئ اعظم قدس سرہٗ میری خاطر اتنا طویل سفر برداشت کریں۔ فوراً ٹیلی گرام دیا کہ جبل پور میں حاجر ہورہا ہوں، چنانچہ قاری مسلحالدین جبل پور پہنچے اور حجور مفتی اعطم مولانا مصطفیٰ رضا نوری بریلوی قدس سرہٗ نے قاری مصلح الدین کو اجازت وخلافت سے نوازا۔ یہ واقعہ ۱۳۷۶ھ کا ہے۔ اس وقت قاری صاحب کی عمر چالیس سال تھی۔

اوصاف

علامہ قاری مصلح الدین علیہ الرحمہ بڑے نیک پارسا اور متقی تھے۔ پرہیز گاری کا یہ عالم تھا کہ کوئی سبق بغیر وضو کے نہ پڑھاتے تھے اور نہ بے وضو رہتے تھے۔ خالی پیریڈ میں دارالعلوم امجدیہ کراچی میں اشراق کی نماز کی ادائیگی قاری مسلح الدین کا معمول تھا۔ حلم و بردباری کے مالک تھے۔ گو کہ ظرافت ان میں کوٹ کوٹ کر بھری ہوئی تھی۔ بہت کم گوتھے۔ ان کے تمام معاملات میں سنجیدگی تھی۔

ورزش بھی فرماتے تھے۔ ایک مرتبہ آپکے ساتھ ایک حادثہ پیش آیات۔ جس میں آپ کی ٹانگ کی ہڈی ٹوٹ گئی۔ قاری مصلح الدین نے اپنے اس حادچہ کی کیفیت بیان کرتے ہوئے ایک موقع پر فرمایا۔ وزشی جسم ہونے کے بنا پر تھوڑی سی ٹوٹ کر رہ گئی ورنہ چور چور ہوجاتی۔ اس چوٹ کے بعد قاری مصلح الدین کو چلنے میں تکلیف ہوتی تھی۔ اس کے باوجود تدریسی خدمات کے ساتھ ساتھ امامت وخطابت اور بندگان خدا کی خدمت مسلسل انجام دیتے رہے۔

خلفاء وتلامذہ

مولانا قاری مصلح علیہ الرحمۃ نے درس وتدریس کا سلسلہ ۱۳۷۵ھ؍ ۱۹۵۵ء میں دارالعلوم مظہریہ آرام باغ کراچی سے شروع کیا۔ اور ۱۳۸۶ھ؍ ۱۹۶۶ء کو دارالعلوم امجدیہ کراچی میں مسند تدریس کو زینت بخشی ۔ اس دوران جن حضرات نے قاری مصلح الدین سے پڑھا ان کی فہرست طویل ہے مختصراً ذکر کیا جاتا ہے۔

۱۔ حضرت مولانا سید شاہ تراب الحق قادری داماد و جانشین

۲۔ مولانا عبدالعظیم قادری

۳۔ مولانا سید یوسف بخاری

۴۔ مولانا عبدالعزیزی عرفی خلیفہ حضرت السید عبدالقادری الگیلانی

۵۔ مولانا جلال الدین احمد نوری

۶۔ مولانا محمد حسن حقانی دارالعلوم امجدیہ کراچی (متوفّٰی: رجب المرجب ۱۴۳۰ھ/۲۰۰۹ء)

۷۔ مولانا عبدالباری صدیقی لیکچر اراسلامیہ کالج کراچی

۸۔ مولانا احمد میاں برکاتی مہتمم دارالعلوم احسن البرکات حیدر آ﷜باد

۹۔ مولانا عبدالعزیز حنفی امام وخطیب مسجد فاروق اعظم

۱۰۔ مولانا حبیب احمد مدرس دارالعلوم امجدیہ ٹیچر

۱۱۔ قاری مقصود اسلام خطیب وارثی جامع مسجد حسرت موہانی کالونی کراچی

۱۲۔ مولانا شاہدین اشرفی۔ خطیب قوت الاسلام مسجد لیاقت آباد کراچی

۱۳۔ مولانا مختار احمد خطیب غوثیہ مسجد لیاقت آباد

۱۴۔ مولانا افتخار احمد مدرس دارالعلوم امجدیہ کراچی

۱۵۔ مولانا محمد فاروق القادری مدرس دارالعلوم امجدیہ کراچی

۱۶۔ مولانا محمد اسماعیل دارالعلوم امجدیہ کراچی

۱۷۔ مولانا حافظ احمد میاں دہلوی مرحوم

۱۸۔ مولانا عبدالستار مدرس و تنظم دارالعلوم امجدیہ کراچی

۱۹۔ مولانا محمد قاسم بریلوی مقیم حال بلوچستان

انتقال پر ملال

حضرت قاری مصلح الدین نے ۷؍جمادی الثانی؍۲۳؍مارچ (۱۴۰۳ھ؍ ۱۹۸۳ء) بروز بدھ بوقت ساڑھے چار بجے سہ پہر داعی اجل کو لبیک کہا۔ قاری مصلح الدین کا انتقال اچانک ہوا۔ منگل بدھ کی درمیانی شب میں بعد نماز عشاء عرس حجۃ الاسلام علیہ الرحمہ کی محفل میں شرکت فرمائی۔ یہ محفل میمن مسجد مصلح الدین گارڈن میں منعقد ہوئی تھی۔ قاری مصلح الدین کی نماز جنازہ میں شرکت کے لیے کم و بیش تیس ہزار فرزندان توحید مصلح الدین گارڈن میں جمع ہوئے۔ جمعرات کے روز تقریباً ساڑھے دس بجے صبح جانشین مفتی اعظم محمد اختر رضا خاں ازہری قادری بریلوی دامت برکاتہم القدسیہ نے نماز جنازہ پڑھائی اور م سجد سے ملحق مصلح الدین گارڈن میں سپرد خاک کردیا گیا۔

جمعہ کے دن بعد نماز جمعہ ایصال ثواب کا بڑے پیماے پر اہتمام ہوا اس موقع پر حضرت جانشین مفتی اعظم دامت وبرکاتہم القدسیہ نے فاتحہ ودعاء سے فارغ ہوکر مولانا شاہ تراب الحق قادری رضوی کو حضرت قاری مصلح الدین کا جانشین مقرر فرمایا۔ اور اپنے دست مبارک سے ہزاروں کے اجتماع میں دستار بندی فرمائی۔

تاریخ وفات

از حضرت مفتی تقدس علی خاں رضوی بریلوی رحمۃ اللہ علیہ

تودین کا مصلح تھا اے جامع عرفان
توزہد میں تقویٰ میں بے مثل تھا لاثانی
ہاتف نے کہا مجھ سے یہ سالِ وفات اسکا
بے شک و شنبہ کہدو تم ہے مغفرت ربانی [1]

۱۹۳۸ء